ەگۋ پۋنكتىندە تەراپەۆت پاتسيەنتتىڭ دەنساۋلىعى جايلى سۇراستىرىپ-سۇحباتتاسىپ وتىر. الماتى قالاسى. ءساۋىر 2021 جىل. فوتو: QT / كۇلتەگىن اسپانۇلى

ءتورتىنشى تولقىندى اۋىر حالدە وتكىزىپ جاتقان الماتى قالاسىندا ناۋقاستار سانى كۇن سايىن ارتىپ كەلەدى.

قوعامدىق دەنساۋلىق ساقتاۋ باسقارماسىنىڭ مالىمەتىنشە،وتكەن تاۋلىكتە تىركەلگەن 420 ادامنىڭ 370 ناۋقاستا سيمپتوم بەلگىلەرى بار، تاعى 50 ادام سيمپتومسىز تۇردە اۋىرعان. 8 شىلدەدە 203 ادام اۋرۋحاناعا جاتقىزىلعان جانە 116 ادام ۇيىنە جىبەرىلگەن.

جالپى قالادا 2516 ادام امبۋلاتورلىق دەڭگەيدە ەمدەلۋدە جانە سىيىمدىلىعى 3700 ورىن بولاتىن ينفەكتسيالىق ستاتسيونارلاردا 1277 ادام جاتىر. ولاردىڭ اراسىندا جاعدايى جەڭىل ءارى ورتا دەڭگەيدە 89 بالا بار. بۇدان وزگە اۋرۋحانداعى ەرەسەكتەردىڭ 900-دەيى اۋىر جانە 3118-ءى ورتا حالدە. ال رەانيماتسيا جانە قارقىندى تەراپيا بولىمدەرىندە 96 ناۋقاس بار. 13 ادام ءوجج، 39 ناۋقاس ءينۆازيۆتى ەمەس ءوجج-ىمەن جانە 30 سىرقات High flow اپپاراتىمەن تىنىستاپ جاتىر.

رەسمي دەرەككە قاراعاندا، جالپىحالىقتىق ۆاكتسيناتسيالاۋ ناۋقانى باستالعالى، ياعني اقپان ايىنان بەرى مەگاپوليستە 339 مىڭ ادام ەكپەنى تولىق دوزاسىن العان. اكىمدىك مالىمەتىنشە، ازىرگە 212 ەگۋ پۋنكتى مەن 308 ەگۋ بريگاداسىندا 1260 مەدقىزمەتكەر جۇمىس ىستەيدى.

ناۋرىز ايىندا باس سانيتار دارىگەر جانداربەك بەكشين ءبىر كۇندە اۋرۋحاناعا جاتقىزىلعاندار سانى 500-دەن اسسا، قالادا لوكداۋن كۇشەيتىلىپ، بلوك-بەكەت قويىلاتىنىن ەسكەرتكەن.

الماتىدا پاندەميا كەزىندە كوروناۆيرۋس پەن پنەۆمونيا سىرقاتتارىنىڭ قاتارى 83 مىڭعا (77 مىڭى كۆي+, 6 مىڭى كۆي-) جەتتى. بەكشيننىڭ ايتۋىنشا، شىلدە ايىندا قالادا ءتورتىنشى تولقىن باستالدى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 448 مىڭعا، 1 تامىزدان بىلايعى كوروناۆيرۋس پنەۆمونياسى 57,5 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 505 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردان 10 424 ادام (كۆي+ / U07.1 – 4576, كۆي- / U07.2 – 3481, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.

"The Qazaq Times"