تاتارستان ۇكىمەتى اپتاپ ىستىققا بايلانىستى 38 مۋنيتسيپالدى اۋداندا توتەنشە جاعداي ەنگىزدى. 

تاتارستان پرەزيدەنتى رۋستام ميننيحانوۆ: «اپتاپ ىستىق پەن جاڭبىردىڭ ازدىعى ەگىنىنىڭ شىعۋىنا جانە ونى جيناۋعا قولايسىز جاعداي تۋعىزىپ وتىر. وسى ماسەلەنى تالقىلاۋ كەرەك جانە ىستىق اۋا رايىنىڭ جاعىمسىز سالدارىن ەڭسەرۋ، رەسپۋبليكانىڭ ازىق-تۇلىك جەتكىلىكتىلىگىن ساقتاۋ بويىنشا شارالاردى قالىپتاستىرۋ قاجەت»، – دەدى.

سونىمەن قاتار جيىندا ەگىستىگىن ساقتاندىرىپ قويعان شارۋاشىلىقتار قاۋىپتى قۇبىلىستاردىڭ وسىمدىكتەردىڭ دامۋىنا اسەر ەتۋىن تىركەپ وتىرۋ ءۇشىن ۋاقىتىلى ساقتاندىرۋ كومپانياسىنا جولىعۋى كەرەكتىگىن ەسكەرتتى.

رەسپۋبليكادا بارلىعى 43 مۋنيتسيپالدى اۋدان مەن ەكى قالالىق وكرۋگ (قازان جانە نابەرەجنىە چەلنى) بار. 34 مۋنيتسيپالدى اۋداندا اڭىزاق، 18 مۋنيتسيپالدى اۋداندا توپىراق قۋاڭشىلىعى، مۋسليۋموۆ جانە سارمانوۆ اۋداندارىندا اتموسفەرالىق قۇرعاقشىلىق تىركەلگەن. سول سەبەپتى توتەنشە جاعداي رەجيمى ۇزارتىلۋى مۇمكىن.

"The Qazaq Times"