الماتى قالاسى مەدەۋ اۋداندىق پوليتسيا ءبولىمىنىڭ الدىندا بەلسەندى بايبولات كۇنبولاتقلىنا بوستاندىق تالاپ ەتىپ تۇرعان ءبىر توپ ادام. 24 ماۋسىم، 2021 جىل. فوتو: QT ميات كاشىباي

بۇگىن، 24 ماۋسىمدا الماتىدا 50-گە تارتا ادام مەدەۋ اۋداندىق پوليتسيا ءبولىمىنىڭ الدىنا جينالىپ، ەكى كۇن بۇرىن قىتاي كونسۋلدىعى الدىندا "زاڭسىز پيكەت ۇيىمداستىردى" دەپ ايىپپەن 15 تاۋلىككە قامالعان بەلسەندى بايبولات كۇنبولاتۇلىن بوستاندىققا شىعارۋدى تالاپ ەتتى. ءتۇس بولماي جينالعان ءبىر توپ ادام عيمارات الدىندا تالاپتارىن ايتىپ ءالى تۇر.

جينالعاندار اراسىندا كۇنبولاتۇلىنىڭ تۋىستارى، قىتاي كونسۋلدىعى الدىندا شىڭجاڭداعى تۋىستارىنا اراشا سۇراپ، پيكەت وتكىزىپ جۇرگەندەر، بەلcەندىلەر بار. ولار دۇركىن-دۇركىن "بايبولاتقا بوستاندىق، جاسالماسىن قاستاندىق!" دەگەن ۇران كوتەردى.

نارازىلاردىڭ الدىنا شىققان پوليتسيا قىزمەتكەرلەرى ولارعا كۇنبولاتۇلىنىڭ باسقا جاقتا اكىمشىلىك جازاسىن وتەپ جاتقانىن ايتىپ، تالاپتارىنىڭ "ورىنسىز" ەكەنىن ايتتى. پروكۋرور كەلىپ، جينالعاندارعا ەسكەرتۋ. بىراق جينالعاندار تاراۋدان باس تارتتى. ولار قارسىلىق شاراسىن كۇنبولاتۇلى بوستاندىققا شىعارىلعانشا جالعاستىراتىندارىن ايتتى.

جينالعاندار "بوستاندىق!" دەپ ۇرانداتىپ تۇر. فوتو: QT م.كاشىباي

سول ماڭدا وقيعانى باقىلاپ تۇرعان پوليتسيا قىزمەتكەرلەرى Qazaqtimes ءتىلشىسىنىڭ "جينالعان توپتىڭ تالابى ورىندالا ما؟" دەگەن سۇراعىنا ناقتى جاۋاپ بەرگەن جوق.

شىڭجاڭداعى تۋىستارىن بوساتۋدى تالاپ ەتىپ، قىتايدىڭ الماتىداعى كونسۋلدىعى الدىندا 4,5 ايدان استام ۋاقىتتان بەرى پيكەت وتكىزىپ جۇرگەندەر قازاقستاندا وزدەرىنىڭ قۋدالانا باستاعانىن ايتادى. ولاردىڭ كوبى كەمىندە ءبىر-ەكى رەت اكىمشىلىك جاۋاپقا تارتىلىپ، ايىپپۇل الىپ ۇلگەردى.

"The Qazaq Times"