بۇگىن، 14 ماۋسىمدا الماتى قالاسى اۋەزوۆ اۋداندىق №2 سوتىندا"نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ وپپوزيتسيا بەلسەندىسى جانبولات ماماي مەن ونىڭ ايەلى ينگا يمانبايدىڭ ۇستىنەن تۇسىرگەن شاعىمى بويىنشا نەگىزگى سوت پروتسەسى باستالدى.

مامايدىڭ ادۆوكاتى "شاعىم بەرۋشى جاققا جاقتاستى" دەپ مالىمدەپ، سۋديانى اۋىستىرۋ تۋرالى ءوتىنىش جاسادى. بۇعان قوسا، ايىپتالۋشى تاراپ – ماماي مەن ونىڭ ادۆوكاتى ەرلان قاليەۆ الماتى قالاسى كوروناۆيرۋس بويىنشا "جاسىل ايماققا" وتكەندىكتەن سوتتى وفلاين رەجيمدە وتكىزۋدى ۇسىندى.  سونداي-اق ماماي مەن يمانبايدىڭ قورعاۋشىلارى سوتقا باۋىرجان بايبەكتىڭ تۋىستارىن كۋاگەر رەتىندە شاقىرۋدى سۇرادى. ولاردىڭ تۇسىندىرۋىنشە، "ىسكە قاتىسى بار قۇجاتتاردا بايبەكتىڭ اكەسى، قارىنداسى، ايەلىنىڭ تۋىستارىنىڭ اتى اتالادى".

"جانە بايبەكتىڭ ءوزى دە پروتسەسكە كەلۋى ءتيىس. سەبەبى، باستى جاۋاپكەر – سول. ونىڭ ادۆوكاتى الماتى قالاسىنىڭ اكىمى بولعان جوق" دەدى جانبولات ماماي.

ال سۋديا رايحان سارتاەۆا بۇل وتىنىشتەردىڭ ەشقايسىسىن قاناعاتتاندىرعان جوق.

"The Qazaq Times"