قىرعىزستان شەكاراشىلارى بىشكەككە دۋشانبەدەن كەلگەن تاجىك ازاماتتارىن ەلگە كىرگىزگەن جوق.

ماناس اۋەجايىنىڭ ءباسپاسوز قىزمەتى «سومون ەير» اۋە كومپانياسىنىڭ چارتەرلىك رەيسىندە تاجىكستاننىڭ 177 جانە باسقا ەلدەردىڭ بىرنەشە ازاماتى بولعانىن جازدى. رەسمي دۋشانبە ازاماتتارى ءۇشىن شەكارانىڭ جابىلعاندىعى تۋرالى ەشقانداي رەسمي حابار الماعانىن، قىرعىزستاننىڭ اۆياتسيالىق ورگاندارى ۇشىپ كەلۋگە رۇقسات بەرگەنىن جەتكىزدى.

تاجىكستاننىڭ بىشكەكتەگى كونسۋلى جاعدايدى كەلىسسوز ارقىلى شەشپەك بولعان. كەيىن قىرعىز رەسپۋبليكاسىنىڭ ۇلتتىق قاۋىپسىزدىك كوميتەتى شەكارا ماسەلەسى بويىنشا شەكتەۋلەر بىلتىر كوكتەمدە كوروناۆيرۋسقا بايلانىستى ۋاقىتشا ەنگىزىلدى دەپ مالىمدەدى. ساراپشىلار بۇل ماسەلەگە قىرعىز-تاجىك شەكارا داۋى سەبەپ بولۋى مۇمكىن دەيدى.

28 ساۋىردە باتكەن وبلىسىنىڭ تاجىكستانمەن شەكارالاس كوك-تاش اۋىلى ماڭىندا سۋ تاراتۋ پۋنكتى اۋماعىندا قىرعىز جانە تاجىك ازاماتتارى جانجالداسىپ قالعان. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان. سول كۇنى كەشكە تاراپتار اتىستى توقتاتۋعا كەلىسكەنمەن، اتىس جەكەلەگەن جەرلەردە 1 مامىرعا دەيىن جالعاستى. بىشكەكتە تاجىك اسكەريلەرى ققاتىعىس كەزىندە پۋلەمەت، مينومەت جانە مي-24 اسكەري تىكۇشاقتارىن قولدانعان.

رەسمي مالىمەتتەر بويىنشا، تاجىكستانمەن شەكاراداعى قاقتىعىس سالدارىنان قىرعىزستاننىڭ 36 تۇرعىنى قازا تاۋىپ، 150-گە جۋىق ادام زارداپ شەككەن. قاقتىعىس كەزىندە رەسپۋبليكادا جۇزدەن استام عيمارات، ونىڭ ىشىندە ەكى مەكتەپ، ءۇش شەكارا زاستاۆاسى، بالاباقشا، ءورت ءسوندىرۋ ءبولىمى، ميليتسيا بولىمشەسىنىڭ عيماراتى، سونداي-اق جۇزدەن استام ءبىر قاباتتى تۇرعىن ءۇي ورتەنگەن. قاقتىعىس ايماعىنان جالپى العاندا 33 مىڭ بەيبىت تۇرعىن ەۆاكۋاتسيالاندى.

كەڭەس وداعى 1991 جىلى قۇلاعالى بەرى ورتالىق ازياداعى كەيبىر مەملەكەتتەر شەكارا ماسەلەسىن شەشە الماي كەلەدى. اسىرەسە، تاجىكستان، وزبەكستان مەن قىرعىزستانعا ورتاق فەرعانا اڭعارى بويىنداعى اۋماقتىڭ داۋلى تۇستارى كوپ. قىرعىز-تاجىك شەكاراسىنىڭ ۇزىندىعى شامامەن 980 كم. قازىرگە دەيىن 580 كيلومەترىنە بايلانىستى دەليميتاتسيا جانە دەماركاتسيا جۇمىستارى جۇرگىزىلگەن.

"The Qazaq Times"