سولتۇستىك كورەيادا جاڭا شەكتەۋ: اقش ۆيدەولارىن كورگەندەرگە ءولىم جازاسى

سولتۇستىك كورەيا ليدەرى «رەاكتسياشىل كوزقاراستاعىلارعا قارسى» دەگەن جاڭا زاڭ جوباسىن قابىلداتتى. بۇل زاڭ شەتەلدىڭ بەينە تاسپالارىن كورگەندەردى، كيىمدەرىن كيگەندەردى، شەتەلدىكتەرگە ەلىكتەپ سويلەگەندەردى جازالايدى. ءتىپتى، اقش پەن جاپونيانىڭ كوپ سانداعى ۆيدەولارىمەن ۇستالعاندار ءولىم جازاسىنا كەسىلمەك.

شەتەل ۆيدەولارىن كورۋ ۇستىندە ۇستالعاندارعا 15 جىلعا دەيىن قاماۋ جازاسى تاعايىندالعان.  قازىرگە دەيىن الەۋمەتتىك جەلىلەرى جوق، ازاماتتار تەك ۇكىمەت رۇقسات ەتكەن بىرنەشە سايتقا عانا كىرە الاتىن سولتۇستىك كورەيادا وسىنداي جاڭا شەكتەۋلەر كىرگىزىلۋدە.

كحدر ليدەرى كيم جوڭ ۋن (كيم چەن ىن) جاقىندا ەلدەگى «جاستار ليگاسىنا» قاراتا مالىمدەمە جاساپ، «كۇدىكتى، قوعامعا قارسى جانە ءوزىمشىل» جاستاردى جازالاۋعا شاقىردى. اتالعان مالىمدەمەسىندە، شەتەلدىڭ كيمدەرى، شاش ۇلگىلەرى، ءسوز سويلەۋى «قورقىنىشتى ۋ» دەپ باعالاپ، ەل جاستارىن «ۋلانباۋعا» شاقىرعان.

وڭتۇستىك كورەيانىڭ جانە وزگە شەتەلدىك ساراپشىلارى سولتۇستىك كورەيا ليدەرىنىڭ بۇل قادامىن «قارۋسىز سوعىس» قاتارىندا باعالاۋدا. سەبەبى، اتالمىش جاڭا زاڭ جوباسىن وڭتۇستىك كورەيادا شىعاتىن "The Daily NK" باسىلىمى ءبىرىنشى بولىپ جاريالاعان.

قازىرگى تاڭدا سولتۇستىك كورەيادا ميلليونداعان ادام كەدەيشىلىك پەن اشتىق جاعدايىن ءومىر سۇرۋدە. شەتەلدىك كينو-سەريالداردان جاقسى تۇرمىس، دۋماندى قالا ومىرلەرىن كورۋ ەلدەگى قاراپايىم تۇرعىنداردىڭ قالىپتان تىس «حوببيىنا» اينالعان. ونسىز دا الەۋمەتتىك جاعدايى اۋىر ەلدە پاندەميا كەزىندەگى شەكتەۋلەر ءتىپتى دە وڭاشالاپ تاستاعان.

“The Qazaq Times”