Ashyq قوسىمشاسىن پايدالانىپ تۇرعان ادام. كورنەكى سۋرەت. فوتو: Atameken.kz

Ashyq قوسىمشاسى ارقىلى وقشاۋلاۋ رەجيمىن بۇزعاندار انىقتالىپ، جاۋاپقا تارتىلادى. بۇل تۋرالى 7 ماۋسىمدا سانيتارلىق-ەپيدەميولوگيالىق قاداعالاۋ جونىندەگى كوميتەت حابارلادى.

"دەنساۋلىق ساقتاۋ مينيسترلىگىنىڭ بۇيرىعىنا سايكەس، Ashyq اقپاراتتىق پلاتفورماسىنىڭ كومەگىمەن وقشاۋلاۋ رەجيمىن بۇزعاندار انىقتالادى. جۇيەدەگى دەرەك "قىزىل ستاتۋسى" بار ادامداردىڭ قوعامدىق نىساندارعا بارعانىنا دالەل بولىپ سانالادى. ياعني، كارانتيندەگى ناۋقاستىڭ سانيتارلىق-ەپيدەميولوگيالىق تالاپتاردى ساقتاماۋى اكىمشىلىك كودەكستىڭ 802-بابىنا سايكەس ءىس قوزعالىپ، اكىمشىلىك جاۋاپقا تارتىلۋىنا تۇرتكى بولادى" دەلىنگەن كوميتەت حابارلاماسىندا.

ەگەر ازامات ءوزىنىڭ ستاتۋسىنىڭ "قىزىل" ەكەنىن بىلە تۇرا قورشاعان ورتاعا قاۋىپ توندىرسە، وعان شامامەن 87 مىڭ تەڭگە كولەمىندە (30 ايلىق ەسەپتكى كورسەتكىش، 205 دوللار) ايىپپۇل سالىنادى.

ەرەجە 10 ماۋسىمدا كۇشىنە ەنەدى. پلاتفورماداعى دەرەكتەر تسيفرلىق دامۋ، يننوۆاتسيا جانە اەروعارىش ونەركاسىبى مينيسترلىگىندە تىركەلەدى. كوميتەت بۇل شارالار حالىقتى ىندەتتەن قورعاۋعا كومەكتەسەدى دەپ سانايدى.

"The Qazaq Times"