اقش پرەزيدەنتى دجو بايدەن قىتايدىڭ 60 كومپانياسىن قارا تىزىمگە قوستى.

2 تامىزدا كۇشىنە ەنەتىن قۇجات بويىنشا اقش-تىڭ كەز كەلگەن ازاماتى تىزىمگە ەنگەن كومپانيالاردىڭ ەشقايسىنا ينۆەستيتسيا سالا المايدى جانە قۇندى قاعازدارىن ساتىپ الۋعا تىيىم سالىنادى. بايدەننىڭ ايتۋىنشا، بۇل كومپانيالار اقش تىڭ ۇلتتىق قاۋىپسىزدىگىنە جانە دەموكراتيالىق قۇندىلىقتارىنا نۇقسان كەلتىرەدى.

باتىس ەلدەرىنىڭ قىتايعا سانكتسيا ەنگىزۋىنىڭ نەگىزگى سەبەبى – شىڭجاڭ گەنوتسيدى بولاتىن. وسى رەتتە اقش مەملەكەتتىك حاتشىسى ەنتوني بلينكەن مالىمدەمەسىندە «وداقتاستارىمىزبەن قىتايدىڭ قىلمىسىن توقتاتۋ ءۇشىن، قىسىم كورگەندەرگە ادىلەتتىلىك ءۇشىن ارەكەتىن جالعاستىرا بەرەمىز» دەدى. بلينكين بەيجىڭنىڭ شىڭجاڭداعى ارەكەتىن «ادامزاتقا قارسى گەنوتسيد ءارى قىلمىس» دەپ سانايدى.

ناۋرىزدا ەۋروپا وداعى شىڭجاڭداعى مۇسىلمانداردىڭ قۇقىعىن بۇزىپ، قىسىم جاساپ جاتقانى ءۇشىن قىتايعا سانكتسيا سالعان. بۇل باستاماعا اقش، ۇلىبريتانيا جانە كانادا دا قوسىلدى. باتىس سانكتسياسىنا ساي، قىتايدىڭ ءتورت شەنەۋنىگى ەو، اقش، كانادا جانە ۇلىبريتانياعا كىرە المايدى، ولاردىڭ اكتيۆتەرى دە بۇعاتتالدى.

"The Qazaq Times"