بريتان اسكەرلەرى وزدەرىنە قىزمەت ەتكەن اۋعانستاندىقتاردى بىرگە الا كەتپەك

اۋعانستاننان شەگىنىپ جاتقان بريتانيانىڭ قارۋلى كۇشتەرى وزدەرىنە قىزمەت ەتكەن اۋعانستاندىقتاردى الىپ كەتپەك. بريتان قارۋلى كۇشتەرى مەن ۇكىمەتىنە قىزمەت ەتكەن 3 مىڭعا جۋىق اۋعان ازاماتىن ىقشام جانە جەدەل تۇردە كوشىرىپ الۋ پلانى جاريالاندى. قازىرگە 1300 ادامنىڭ ماسەلەسى قارالىپ شەشىم تاپقانى بەلگىلى بولدى.

بريتانياعا قىزمەت ەتكەن اۋعانستاندىقتار بريتاندىق قارۋلى كۇشتەر ەلدەن شەگىنىپ كەتكەننەن كەيىن تالىپتەردىڭ نەمەسە ەلدەگى وزگە تەررورلىق توپتاردىڭ شابۋىل قاۋپىندە قالۋى مۇمكىن دەگەن الاڭداۋشىلىق وسى شەشىمگە سەبەپ بولعان. قورعانىس ءمينيسترى بەن ۋوللەس بۇل شەشىمدى تەز ارادا ورىنداۋ «بىردەن ءبىر دۇرىس شەشىم» ەكەنىن ايتقان.

بۇعان دەيىن قارۋلى كۇشپەن بىرگە كوشىرىپ اكەتۋگە لايىق دەلىنگەن اۋعانستاندىقتاردى قاتاڭ تالاپتارمەن تاڭداپ الىنعان. وندا بريتانيا قارۋلى كۇشتەرىنە نەمەسە ۇكىمەتىنە قىزمەت ەتكەن ۋاقىتىنا، تاجىريبەسىنە نەمەسە وزگە دە شارتتارعا لايىق تاڭدالاتىن. الايدا، شەتەلدىك قارۋلى كۇشتەردىڭ شەگىنىپ كەتۋى ولارعا قىزمەت ەتكەن كەز-كەلگەن اۋعانستاندىق ءۇشىن قاۋىپتىڭ باستالۋىمەن بىردەي بولعاندىقتان، بريتان بيلىگى جاڭا ساياسات جاريالاپ، 3000-عا جۋىق اۋعانستاندىقتى وزدەرىمەن بىرگە الىپ كەتۋ شەشىمىن شىعاردى.

شىن مانىسىندە، اۋعانستاندا سوڭعى 20 جىلدا شەتەلدىك ۇكىمەت پەن اسكەرگە اۋدارماشى نەمەسە جول باستاۋشى، وزگە دە قىزمەتكەر بولعان جەرگىلىكتى ادامدارعا ءاردايىم قاۋىپ ءتونىپ كەلدى. بريتانيا ۇكىمەتى وزدەرىنە قىزمەت ەتكەن اۋعانستاندىقتاردى قاۋىپ ورتاسىنا قالدىرىپ كەتپەۋ ەلدىڭ سوڭعى «مورالدىك مىندەتى» دەگەن قورىتىندىعا كەلگەن.

“The Qazaq Times”