استانادا اسكەري پارادقا دايىندىق باستالدى (ۆيدەو)

استانادا 7 مامىر كۇنى اسكەري پارادقا قاتىساتىن پارادتىق ەسەپتوپتار مەن اسكەري تەحنيكانىڭ جاتتىقتىرۋى وتۋدە. قازاقستان قارۋلى كۇشتەرىنىڭ 25 جىلدىعىنا ارنالعان شارانىڭ ماڭىزدىلىعىن جەتە تۇسىنە وتىرىپ، اسكەري قىزمەتشىلەر كۇن سايىن دايىندىقتارىن پىسىقتاۋدا دەپ حابارلادى قازاقستان قارۋلى كۇشتەرىنىڭ رەسمي سايتى.

پارادقا قاتىسۋشىلاردىڭ جاتتىعۋلارى كۇن سايىن وتكىزىلەدى. سونداي-اق، اسكەري تەحنيكانى جوسپارلى تەكسەرۋ جانە تەحنيكالىق قىزمەت كورسەتۋ ءجۇرىپ جاتىر.

ەلىمىزدىڭ ءارتۇرلى وڭىرىنەن كەلگەن اسكەري قىزمەتشىلەر پالاتكالى قالاشىققا جايعاسىپ، اسكەري تەحنيكا ۇرىس ماشينالارىنىڭ ارنايى دالالىق پاركىندە ورنالاستىرىلدى. دالالىق لاگەردە جەكە قۇرامعا ارنالعان بارلىق قاجەتتى جاعداي جاسالعان. اتاپ ايتقاندا، تۇرۋعا ارنالعان پالاتكالار، مەديتسينالىق پۋنكتتەر، تاماقتانۋ پۋنكتتەرى جانە دالالىق مونشا. دالالىق قالاشىقتىڭ اۋماعىندا بوس ۋاقىتتى ۇيىمداستىرۋ ءۇشىن جىلجىمالى اقپاراتتىق كەشەن جۇمىس ىستەۋدە. ودان باسقا، دەمالىس كۇندەرى اسكەري قىزمەتشىلەردىڭ ەلوردانىڭ مادەني نىساندارى مەن كورىكتى جەرلەرىنە ارالاۋ قاراستىرىلعان.

استانادا وتەتىن پارادقا ءبىر ايعا جەتپەيتىن ۋاقىت قالدى. تارتىلاتىن جەكە قۇرام مەن اسكەري تەحنيكانىڭ رەكوردتىق سانىنان باسقا، الداعى وتەتىن پارادتىڭ ەرەكشەلىكتەرىنىڭ ءبىرى الاڭدا اسكەري-تەحنيكالىق مەكتەپتەردىڭ ءاۆتوموبيلدى تەحنيكاسىندا قازاقستان قارۋلى كۇشتەرى ارداگەرلەرى، «جاس ۇلان» ءتورت اسكەري مەكتەپ پەن اسكەري-پاتريوتتىق كلۋبتاردىڭ تاربيەلەنۋشىلەرى جانە قورعانىس مينيسترلىگى اسكەري-تەحنيكالىق مەكتەپتەرىنىڭ وقۋشىلارى ءجۇرىپ وتەدى. سونداي-اق، اۋماقتىق قورعانىس بريگادالارى قۇراما روتاسى قاتىسادى.

“The Qazaq Times”