عالىمدار كونفەرەنتسياسىندا نازارباەۆقا ەسكەرتكىش قويۋ تۋرالى ۇسىنىس ايتىلدى

كەشە، 24 مامىردا "تۇركىستان – تۇرىك الەمىنىڭ رۋحاني استاناسى: ينتەگراتسيا جانە ىنتىماقتاستىقتىڭ بولاشاعى" اتتى ونلاين-كونفەرەنتسيادا قازاقستاننىڭ ەكس-پرەزيدەنتى نۇرسۇلتان نازارباەۆقا تۇركىستاندا ەسكەرتكىش ورناتۋ تۋرالى ۇسىنىس ايتىلدى.  مۇنداي ۇسىنىستى تۇركسوي باس حاتشىسىنىڭ ورىنباسارى بيلال چاكىدجي ايتقان.

"تۇركى الەمىنىڭ رۋحاني ورتالىعى – تۇركىستاندا وسى قالانىڭ جاڭعىرۋىنا ىقپال ەتكەن، سونىمەن بىرگە تۇركى حالىقتارىنىڭ ينەگراتسياسىنا ولشەۋسىز ۇلەس قوسقان نۇرسۇلتان ءابىشۇلى نازارباەۆقا ەسكەرتكىش قويۋدى ۇسىنامىن. بۇعان نەگىز دە كوپ. مۇنداي يدەيا تۇركى الەمىندەگى دانا اقساقالعا دەگەن ەرەكشە قۇرمەتتەن تۋىندادى، ول مەملەكەت باسشىسى بولا وتىرىپ، تۇركى حالىقتارىنىڭ بىرلىگىن قولدادى، قازاق حالقىن گۇلدەندىرۋگە ۇمتىلىپ، تاۋەلسىزدىگىن ساقتاپ قالۋعا كۇش سالدى" دەدى بيلال چاكىدجي.

ال كونفەرەنتسياعا قاتىسۋشىلار چاكىدجيدىڭ  ۇسىنىسىن قولداعان.

سوڭعى جىلدارى قازاقستاندا ازاماتتاردىڭ قارسىلىعىنا قاراماستان، نازارباەۆقا ەسكەرتكىشتەر قويىلىپ، ونىڭ ەسىمى كوشەگە، ۆوكزالعا، ساياباققا، مەكتەپكە بەرىلە باستادى. كەيبىر ساراپشىلار بۇنى "جەكە باسقا تابىنۋ" دەپ ەسەپتەيدى. ال بيلىكشىل كوزقاراستاعى ادامداردىڭ ويىنشا، بۇل – نازارباەۆقا كورسەتىلگەن قۇرمەت.

قازاقستاندى 30 جىلعا جۋىق ۇزدىكسىز باسقارعان نۇرسۇلتان نازارباەۆ 2019 جىلى پرەزيدەنت لاۋازىمىن سول كەزدەگى سەنات سپيكەرى قاسىم-جومارت توقاەۆقا تاپسىرعان. ول پرەزيدەنتتىكتەن كەتكەنىنە ەكى جىل بولسا دا ەلدەگى بيلىكتىڭ ءبىر تارماعىن ءالى دە قولىندا ۇستاپ وتىر.

"The Qazaq Times"