بەلارۋس بيلىگى جۋرناليستەر مەن تاۋەلسىز باق-قا قىسىم جاساۋدى توقتاتۋى كەرەك. بۇل تۋرالى ەو سىرتقى ساياسات قىزمەتىنىڭ مالىمدەمەسىندە ايتىلعان.

مالىمدەمەدە مينسكىنىڭ tut.by پورتالىنا، باسقا تاۋەلسىز بۇقارالىق اقپارات قۇرالدارى مەن جۋرناليستەرگە قارسى قىسىمى ەل بيلىگىنىڭ ءسوز بوستاندىعىن مۇلدەم ەسكەرمەگەنىن كورسەتەدى. مۇنىڭ بارلىعى بەلارۋس قابىلداعان نەگىزگى حالىقارالىق مىندەتتەمەلەرگە قايشى كەلەدى. جۋرناليستەردى قۋدالاۋ توقتاتىلىپ، بارلىق ساياسي تۇتقىندار بوساتىلۋى كەرەك»، – دەلىنگەن.

ەۋروپالىق وداق سونىمەن بىرگە «بەيبىت شەرۋشىلەرگە جانە قوعامنىڭ ءتۇرلى سالالارىنا، سونىڭ ىشىندە قۇقىق قورعاۋشىلارعا، ساياسي وپپوزيتسيا مۇشەلەرىنە قاتىستى زورلىق-زومبىلىق پەن رەپرەسسيانى توقتاتۋعا» شاقىردى.

سەيسەنبىدە بەلارۋس مەملەكەتتىك باقىلاۋ كوميتەتىنىڭ قارجىلىق تەرگەۋ دەپارتامەنتى «Tut by Media» جاۋاپكەرشىلىگى شەكتەۋلى سەرىكتەستىگىنىڭ لاۋازىمدى تۇلعالارىنا قاتىستى سالىق تولەۋدەن جالتاردى دەپ قىلمىستىق ءىس قوزعادى. باس پروكۋراتۋرانىڭ حابارلاماسى نەگىزىندە رەسپۋبليكانىڭ اقپارات مينيسترلىگى tut.by ينتەرنەت-رەسۋرسىن بۇعاتتاۋ تۋرالى شەشىم قابىلدادى. ءتىنتۋ كومپانيانىڭ ورتالىق كەڭسەسىندە، سونداي-اق ونىڭ ايماقتىق كەڭسەلەرىندە جۇرگىزىلدى. رەسپۋبليكاداعى ەۋرووداق وكىلدىگى جانە اقش ەلشىلىگى بەلارۋس بيلىگىنىڭ پورتالعا قاتىستى ارەكەتتەرىن ايىپتادى.

وتكەن جىلدىڭ سوڭىندا مينسك ەكونوميكالىق سوتى بەلارۋس اقپارات مينيسترلىگىنىڭ ءوتىنىشىن قاناعاتتاندىرىپ، tut.by پورتالىن بۇقارالىق اقپارات قۇرالى مارتەبەسىنەن ايىردى. سودان كەيىن tut.by رەداكتسياسى پورتال ينتەرنەت-رەسۋرس رەتىندە جۇمىسىن جالعاستىراتىنىن ايتتى. سونىمەن بىرگە ەل بيلىگى پورتال جۋرناليستەرىن مەملەكەتتىك ورگاندارعا رەسمي اقپارات الۋ ءۇشىن جۇگىنۋ قۇقىعىنان ايىرىپ، بۇقارالىق ءىس-شارالارعا قاتىسۋعا تىيىم سالدى.

"The Qazaq Times"