بەلارۋستە نارازىلىقتى اسكەري تەحنيكامەن باسۋعا رۇقسات ەتىلدى

بەلارۋستە نارازىلىقتى اسكەري جانە ارنايى تەحنيكانىڭ كومەگىمەن باسۋعا رۇقسات بەرەتىن قۇجات قابىلداندى. قۇجاتقا الەكساندر لۋكاشەنكو قول قويدى.

ميتينگكە شىققان نارازىلاردى ۇستاۋ «زاڭناما تالاپتارىنا ساي جۇرگىزىلۋى كەرەك». ەندى ميليتسيا قىزمەتكەرلەرى ازاماتتارعا وزدەرىنىڭ ارەكەتىن سۋرەتكە تۇسىرۋگە نەمەسە ۆيدەوعا تۇسىرۋگە تىيىم سالا الادى. سونداي-اق اتالعان قۇجات اسكەري تەحنيكا نەمەسە قارۋ پايدالانعان قۇقىق قورعاۋ ورگان وكىلدەرىن ۇستاۋ كەزىندە كەلتىرگەن شىعىنى ءۇشىن جاۋاپقا تارتپاۋعا مۇمكىندىك بەرەدى.

بۇعان دەيىن بەلارۋس بيلىگىنە 1994 جىلى كەلگەن 66 جاستاعى لۋكاشەنكو پارلامەنتكە بيلىكتى سىناعاندار مەن نارازىلىققا شىققاندارعا جازانى كۇشەيتەتىن زاڭ قابىلداۋعا يتەرمەلەدى. جۋرناليستەردىڭ رۇقسات ەتىلمەگەن ميتينگ ورنىنان حابار تاراتۋىن جانە ونى ينتەرنەتتە كورسەتۋىن قىلمىس دەپ تانيتىن تاعى ءبىر وزگەرىس قارالىپ جاتىر.

بىلتىر 9 تامىزدا لۋكاشەنكونىڭ سايلاۋدا جەڭىسكە جەتكەنى حابارلانعاننان كەيىن ەلدە نارازىلىق ءورشىدى. نارازىلار سايلاۋ كەزىندە جاپپاي داۋىس ۇرلانعانىن العا تارتتى جانە وپپوزيتسيا كانديداتى، سۆەتلانا تيحانوۆسكايا جەڭدى دەپ سانايدى. نارازىلىقتار كەزىندە 30 مىڭنان استام ادام ۇستالدى. ۇكىمەت قاتاڭ جازالاۋ شارالارى كەزىندە مىڭداعان ادامدى ۇرىپ-سوعىپ، ازاپتادى.

«ۆەسنا» ورتالىعىنىڭ حابارلاۋىنشا، بەلارۋستە 369 ساياسي تۇتقىن بار. وپپوزيتسيا ليدەرلەرىنىڭ كوبى تۇرمەدە وتىر نەمەسە ەلدەن قاشقان. سونىمەن قاتار نارازىلىقتار تۋرالى حابار تاراتقان جۇزدەگەن جۋرناليست تە قۋدالاۋعا تۇسكەن.

"The Qazaq Times"