ءىرى ەلدەردىڭ جاتتىعۋى: قىتاي قاتەرى جاپونياعا تاريحي وراي سىيلادى

جاپونيانىڭ وڭتۇستىگىندەگى شاعىن ارالداردى قامتىعان جاتتىعۋ ايماعىندا جاپون، امەريكالىق جانە فرانتسۋز جاۋىنگەرلەرى بىرلەسكەن جاتتىعۋىن وتكىزۋدە. سەنبىدە جاتتىعۋ ەڭ قارقىندى تۇردە ءوتتى. ءۇش ەلدىڭ بىرلەسكەن جاتتىعۋى جاپونيانىڭ الىس ارالدارىن جاۋ كۇشتەرى باسىپ الۋ قاتەرىنە قارسى كۇرەس مۇمكىندىگىن ارتتىرۋ ماقساتىندا وتكىزىلۋدە.

ءۇش ءىرى ەلدىڭ ورتاق جاتتىعۋ وتكىزۋىنە قىتايدىڭ ايماقتاعى اسكەري بەلسەندىلىگى سەبەپ بولعانىن بۇعان دەيىن دە ايتقان ەدىك. قۋاتتى تەڭىز كۇشتەرىنە يە بولا باستاعان قىتاي حالىق-ازاتتىق ارمياسى شىعىس جانە وڭۇستىك قىتاي تەڭىزىنە شەكتەسەتىن ەلدەردىڭ قاۋىپسىزدىگى مەن ۇلتتىق مۇددەسىنە قاتەر توندىرۋدە.

سەنبى كۇنى ءۇش ەلدىڭ وننان استام كەمەسى قاتىسىپ جاتقان جاتتىعۋعا قوسىلدى. بۇل شىعىس قىتاي تەڭىزىندەگى بىرلەسكەن جاتتىعۋدىڭ سيپاتى مەن سالماعىن ءتىپتى دە سالماقتى ەتە ءتۇستى. ساراپشىلار اتالعان جاتتىعۋ ءوز كەزەگىندە قىتايدىڭ ايماقتاعى ىقتيمال قاتەرىنە قارسى توسقاۋىل سانالعانىمەن، بۇل تايۋان مەن قىتايدى قامتىعان وڭىردەگى شيەلەنىستى ءتىپتى دە ارتتىرا تۇسكەنىن ايتۋدا.

قىتايدىڭ اسكەري قاتەرىنىڭ ارتا ءتۇسۋى جاپونيا ءۇشىن ءبىر ەسەپتە قاۋىپتى بولعانىمەن، ەندى ءبىر جاعىنان 100 جىلدىق شەكتەۋى بار اسكەري قۋاتىن ارتتىرىپ الۋعا وراي تۋدىردى. قىتاي قاتەرىنە العا تارتا وتىرىپ جاپونيا ءوزىنىڭ اسكەري كۇشتەرىن كەڭەيتۋدى كوزدەپ وتىر. ءتىپتى، بۇل جاپونياعا فارنتسيا، بريتانيا سەكىلدى باتىستىق تەڭىز دەرجاۆالارىمەن سۋ ءۇستى سوعىستارىندا تاجىريبە الماسۋعا دا ۇلكەن مۇمكىندىك بەردى.

ەكىنشى دۇنيەجۇزىلىك سوعىسىندا تىزە بۇگىپ، جاڭا شارتتارعا قول قويعان جاپونيا ءوزىن قورعاۋ كۇشتەرىنە عانا يە ەل رەتىندە سانالدى. ءتىپتى، ءوزىن قورعاۋ كۇشتەرىنىڭ دە قارۋلى كۇش قولدانۋىنا شەكتەۋ قوياتىن جاڭا كونستيتۋتسيا قابىلداندى. دەگەنمەن، سوڭعى جىلدارى جاپونيا اسكەري قۋاتى مەن بيۋدجەتىن جىل سايىن ارتتىرىپ كەلەدى.

“The Qazaq Times”