«وپىق جەگىزەر ورىنباسار»: اقتوتى رايىمقۇلوۆا وتستاۆكاعا كەتۋگە دايىن

جۇما، 14 مامىر ورتكوم الاڭىندا حالىققا ەسەپ بەرىپ كەزدەسۋ وتكىزگەن مادەنيەت جانە سپورت ءمينيسترى اقتوتى رايىمقۇلوۆا ءتىلشىنىڭ قويعان ساۋالىنا ورىنباسارىنىڭ كىناسى سوتتا دالەلدەنسە، وتستاۆكاعا كەتەتىنىن ايتىپ جاۋاپ بەردى.

قاڭتار ايىنىڭ سوڭىندا مادەنيەت جانە سپورت ۆيتسە-ءمينيسترى ساكەن مۇسايبەكوۆتىڭ «ءوز ەركىمەن» قىزمەتىنەن كەتكەنى حابارلانعان. ارتىنشا ونىڭ «جەمقورلىق كۇدىگىنە» ءىلىنىپ ۇستالعانى تۋرالى حابار تاراعان.

«كونستيتۋتسياعا سايكەس، كىناسىزدىك پرەزۋمپتسياسى بار جانە كىنا دالەلدەنۋى ءتيىس. ەگەر ونىڭ كىناسى دالەلدەنسە، زاڭعا سايكەس مەن وتستاۆكاعا كەتۋ تۋرالى ءوتىنىش بەرەمىن» دەدى رايىمقۇلوۆا ەسەپ بەرۋ جيىنى كەزىندە.

قازاقستاندا «مەملەكەتتىك قىزمەت تۋرالى» زاڭعا سايكەس، مەملەكەتتىك قىزمەتكەر جەمقورلىقپەن ۇستالسا، ونىڭ باسشىسى وتستاۆكاعا كەتۋى ءتيىس.

بىراق بۇل عانا ەمەس، بىلتىر كوكتەمدە 2019 جىلى جازدا ۇلتتىق كينونى قولداۋ مەملەكەتتىك ورتالىعىنىڭ باسشىسى بولىپ تاعايىندالعان گۇلنار سارسەنوۆا جەمقورلىق قىلمىسى بويىنشا كۇدىككە ءىلىنىپ، تەرگەۋگە الىنعان. سارسەنوۆا وسى قىزمەتىندە 400 ملن اسا قاراجاتتى «اسادى» دەگەن سەبەپپەن قىلمىستىق ءىس قوزعالا سالا جاساعىنا «وكىنىپ» مەملەكەت قاراجاتىن قايتارىپ بەردى. وسىلايشا جازادان وڭاي دا جەڭىل اينالىپ ءوتتى. سونىمەن قوسا، ول كينوگەرلەر تاراپىنان مەملەكەت بولگەن قارجىنىڭ تۇگەل دەرلىگىن كوممەرتسيالىق جوبالارعا بايلاپ بەردى دەپ تە قاتتى سىنالعان. مينيستر ءوزى تاعايىنداپ، جىل وتپەي باسى داۋعا قالعان ەسكى ارىپتەسى جونىندە اشىپ ەشتەڭە ايتپادى.

مادەنيەت سالاسىنداعى مەملەكەت قارجىسىن تالان-تاراجعا سالاتىندار از ەمەس. وسىعان دەيىن اقتاۋداعى نۇرمۇحان ءجانتورين اتىنداعى وبلىستىق مۋزىكالىق دراما تەاتردىڭ بۇرىنعى ديرەكتورى نۇرنياز مۇقانوۆ قىزمەتتىك لاۋازىمىن اسىرا پايدالانىپ، جۇمىس ىستەمەيتىن تانىسىنىڭ ەسەپشوتىنا ءبىر جىلدان اسا ۋاقىت بويى زاڭسىز جالاقى اۋدارىپ، بيۋدجەتكە 1,4 ملن تەڭگە شىعىن كەلتىرگەن. ودان ىلگەرى ەلوردادا ورنالاسقان م.گوركي اتىنداعى اكادەميالىق وبلىستىق دراما تەاترىنىڭ ەكس-ديرەكتورى دا جوندەۋ جۇمىسىنا بولىنگەن قاراجاتتى جىمقىردى دەگەن ايىپپەن قىزمەتتەن شەتتەتىلسە، وسىدان ءبىراز بۇرىن استانانىڭ مادەنيەت جانە سپورت باسقارماسىنىڭ ەكس-باسشىسى نۇرلان سىدىقوۆ، م.اۋەزوۆ تەاترىنىڭ بۇرىنعى ديرەكتورى ەرلان ءبىلال دا پارامەن ۇستالىپ، قىلمىستىق جاۋاپكەرشىلىككە تارتىلعان. بىراق وسى جايتتاردىڭ بىردە-بىرىندە جوعارى باسشى وتستاۆكاعا كەتكەن جوق.

ءدال وسى استانادا مادەنيەت باسقارماسىنىڭ باسشىسى سادىقوۆتىڭ سوتىنان كەيىن اكىم ورىنباسارى باقتيار ماكەن وتستاۆكاعا جازعان كەزىندە اكىم التاي كولگىنوۆ ءوتىنىشىن قابىلداماي، وعان قاتاڭ سوگىس جاريالاۋمەن شەكتەلگەن. ساراپشىلار مەن ساياساتتانۋشىلاردىڭ ءبىر بولىگى توقاەۆتىڭ بۇل شەشىمىن «كوزبوياۋشىلىق» دەڭگەيىندەگى «جالعان رەفورما» رەتىندە ەسەپتەيدى.

«سەنىمنەن كەتتى» دەگەن سوگىسپەن 2019 جىلى شىمكەنت اكىمى قىزمەتىنەن الىنعان عابيدوللا ءابدىراحىموۆ بيىل قاڭتاردا مادەنيەت جانە سپورت ۆيتسە-ءمينيسترى بولىپ تاعايىندالدى. قازاقستاندا جۇمىسىنا قوعام قىرىن قاراپ نە جوعارى باسشىلىققا جاقپاعان كەيىپتە ورنىنان كەتىپ، كەيىننەن ءتىپتى بيىك لاۋازىمعا باراتىن شەنەۋنىكتەر از كەزدەسپەيدى. سونىڭ ءبىر پاراسىن ازاتتىق راديوسىنىڭ شولۋىنان كورۋگە بولادى.

"The Qazaq Times"