ورتالىق ازيا ەلدەرى قازاقستان مەن وزبەكستان جىل سوڭىنا دەيىن «ازيالىق شەنگەن» – Silk Road ورتاق ۆيزاسىن ەنگىزۋدى جوسپارلاپ وتىر

«ازيالىق شەنگەن» اتالاتىن Silk Road Visa جوباسىن ەنگىزۋ جۇمىستارىن وسى جىلدىڭ سوڭىنا دەيىن اياقتاۋدى جوسپارلاپ وتىر. بۇل تۋرالى «Sputnik قازاقستان» باسىلىمىنا مادەنيەت جانە سپورت مينيسترلىگى حابارلادى. باستاپقى كەزەڭدە Silk Road جوباسىنا قازاقستان مەن وزبەكستان كىرەدى.

مادەنيەت مينيسترلىگىنىڭ حابارلاۋىنشا، Silk Road Visa كوپ رەتتىك ەلەكتروندىق تۋريستىك ۆيزاسى تۋرالى ەرەجەلەر جانە ازاماتتارى وسىنداي ۆيزاعا جۇگىنە الاتىن ەلدەردىڭ بىرىڭعاي ءتىزىمى كەلىسىلدى. ۆيزا بەرۋدىڭ بىرىڭعاي ەلەكتروندىق جۇيەسىن ەنگىزۋ بويىنشا كەلىسسوزدەر جۇرگىزىلۋدە.

بولاشاقتا «ازيالىق شەنگەن» قۇرامىنا قىرعىزستان مەن ءازىربايجان كىرەدى دەپ كۇتىلۋدە. Silk Road Visa كوپ رەتتىك ەلەكتروندىق تۋريستىك ۆيزاسى الەمنىڭ تۇكپىر-تۇكپىرىنەن كەلگەن تۋريستەرگە بىردەن بىرنەشە ەلگە بارۋعا مۇمكىندىك بەرەدى. ۇسىنىلعان تەتىك ترانسۇلتتىق تۋريستىك ءونىم جولىنداعى كەدەرگىلەردى ەڭسەرۋگە مۇمكىندىك بەرمەك.

وزبەكستان ۆيتسە-پرەمەرىنىڭ بىلتىرعى مالىمدەمەسىنە سايكەس، Silk Road جوباسىن 2020 جىلى ىسكە قوسۋ جوسپارلانعان بولاتىن. ال العاش «ازيالىق شەنگەن» قۇرۋ يدەياسىن 2018 جىلدىڭ ماۋسىمىندا داريعا نازارباەۆا كوتەرگەن ەدى. 2019 جىلى قازاقستاننىڭ سىرتقى ىستەر مينيسترلىگى بۇل ماسەلە تەرەڭىرەك زەرتتەۋدى تالاپ ەتەتىنىن حابارلادى.

"The Qazaq Times"