قىرعىزستان مەن تاجىكستان ۇكىمەتتەرى قاقتىعىستى توقتاتۋ تۋرالى كەلىسىمگە كەلگەنىنە قاراماستان شەكارادا قايتا اتىس باستالدى. 

رەسمي مالىمەتتەر بويىنشا، اتىس اركا، دوشتىك جانە جاشتىك اۋىلدارىندا بولىپ جاتىر. باتكەن اۋدانىنىڭ كوكتەرەك اۋىلىندا 17 ءۇي جانىپ كەتتى. تاعى بىرنەشە ەلدىمەكەندە ۇيلەر مەن جانارماي بەكەتتەرى وتقا ورانعان. لەيلەك اۋدانىنان 13,5 مىڭ ادام ەۆاكۋاتسيالانعان. اۋدانداعى بوربوردۋك، اركا، ينتەرناتسيونال، جاشتىك جانە ماكسات اۋىلدارى دا زارداپ شەككەن. مۇندا 27 جانار-جاعارماي ستانتسياسى تۇتاس جانىپ كەتكەن، دۇكەن-دۇڭگىرشەكتەر تونالعان.

28 ساۋىردە باتكەن وبلىسىنىڭ تاجىكستانمەن شەكارالاس كوك-تاش اۋىلى ماڭىندا سۋ تاراتۋ پۋنكتى اۋماعىندا قىرعىز جانە تاجىك ازاماتتارى جانجالداسىپ قالعان. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان.

بۇگىن قىرعىزستان پرەمەر-ءمينيسترى ۋلۋكبەك ماريپوۆ پەن تاجىكستان پرەمەر-ءمينيسترى كوحير راسۋلزودا بەيسەنبى كۇنى قازان قالاسىنداعى الدىن-الا جوسپارلانباعان كەزدەسۋ كەزىندە ماسەلەنى كۇشپەن شەشۋگە جول بەرۋگە بولمايتىنىن ايتقان. قىرعىز ۇكىمەتىنىڭ ءباسپاسوز قىزمەتىنىڭ حابارلاۋىنشا، تاراپتار ماسەلەنى كەلىسسوز ارقىلى شەشۋگە دايىن ەكەنىن ءبىلدىردى. بۇل جاعدايعا بايلانىستى مالىمدەمە جاساعان قىرعىزستان پرەزيدەنتى سادىر جاپاروۆ«بارلىق تۇرعىنداردى، ونىڭ ىشىندە ساياسي كۇشتەر مەن اقپارات قۇرالدارىن ارانداتۋعا بەرىلمەي، ارازدىق وتىن جاقپاۋعا» شاقىردى. سونداي-اق جاپاروۆ «تاجىك باۋىرلارىمىزبەن ءتىل تابىسامىز، بارلىق ماسەلەلەردى شەشەمىز» دەدى.

1980 جىلعى ەكى جاقتى كەلىسىمگە سايكەس، تاراتۋ بەكەتىندەگى سۋ قورىنىڭ 37%-ى قىرعىزستانعا، 63%-ى تاجىكستانعا تيەسىلى. شەكارانىڭ ناقتىلانباۋى مەن سۋعا تالاس ەكى ەل اراسىندا وسىنداي قاقتىعىس تۋدىرىپ كەلەدى.

"The Qazaq Times"