اقش-تىڭ رەسەيدەگى ەلشىسى ۆاشينگتونعا باردى

رەسەيدەگى اقش ەلشىسى دجون سالليۆان ۆاشينگتونعا باردى. ول ەكى ەل اراسىنداعى ۋشىققان جاعداي جونىندە پرەزيدەنت دجو بايدەنمەن تالقى وتكىزبەك.

ەلشى بەيسەنبىدە شەرەمەتەۆو اۋەجايىنان ماسكەۋ-لوندون رەيسىمەن ۇشىپ، ۇلىبريتانيادان ۆاشينگتونعا بەت الدى. وسى اپتا ول اق ءۇي باسشىسىمەن كەزدەسۋ وتكىزەدى.

ۆاشينگتون مەن ماسكەۋ بايلانىسى بايدەننىڭ سۇحباتىنان كەيىن ۋشىعىپ كەتتى. امەريكالىق اۆس تەلەارناسىنا سۇحبات بەرگەن دجو بايدەن «ءسىز ءپۋتيندى قانىشەر دەپ ەسەپتەيسىز بە؟» دەگەن سۇراققا «ءيا!» دەپ جاۋاپ بەرگەن. سۇحباتتا ماسكەۋدىڭ 2020 جىلى اقش-تاعى پرەزيدەنت سايلاۋىنا ارالاسقانى جايلى بايانداعان امەريكالىق بارلاۋ قىزمەتىنىڭ ەسەبى ءسوز بولعان. بايدەن ەگەر رەسەيدىڭ سايلاۋعا ارالاسقانى راستالسا، ونىڭ ارتى جاقسىلىققا اپارمايدى دەپ پۋتينگە ەسكەرتۋ جاسادى. اتالعان سۇحباتتان كەيىن رەسەي ۋاشينگتونداعى ەلشىسىن ماسكەۋگە قايتاردى.

كەيىننەن پۋتين بايدەندى ديالوگقا شاقىرىپ، «روسسيا-24» تەلەارناسى جۇرگىزگەن ترانسلياتسيادا «امەريكالىق ارىپتەسىمنىڭ مالىمدەمەسىنە كەلسەك، ول ايتقانداي ءبىزدىڭ شىنىمەن دە جەكە تانىستىعىمىز بار. وعان ەندى نە دەيىن؟ مەن وعان «دەنىڭىز ساۋ بولسىن» دەپ ايتار ەدىم. بالا كەزدە اۋلادا ءبىر-بىرىمىزبەن داۋلاسىپ قالعان كەزدە ايتۋشى ەدىك: «كىم بىرەۋدى جامان اتپەن اتاسا، ءوزى سول اتقا لايىق». جانە بۇل ءجاي بالالار اۋزىنداعى ماتەل نەمەسە قالجىڭ ەمەس»، – دەدى. پۋتين، سونداي-اق اقش-تى وتارلاۋ مەن ەكىنشى دۇنيەجۇزىلىك سوعىس كەزىندەگى جاپونيانى بومبالاۋ، اقش-تاعى الەۋمەتتىك ماسەلەلەر، ونىڭ ىشىندە Black Lives Matter قوزعالىسى توڭىرەگىندەگى ماسەلەلەردى اتاپ وتكەن.

15 ساۋىردە اقش پرەزيدەنتى رەسەيگە سانكتسيا ەنگىزۋ تۋرالى جارلىققا قول قويدى. ال 16 ساۋىردە رەسەي امەريكالىق ديپلوماتتاردى ەلدەن شىعاراتىنىن حابارلادى.

"The Qazaq Times"