Қазақстан президенті Қасым-Жомарт Тоқаев. Фото: kommersant.ru
Қазақстан президенті Қасым-Жомарт Тоқаев республикалық және жергілікті жолдардың құрылысы мен жөндеу жұмыстарын ретке келтіру үшін осы саладағы тағы бірнеше шенеунікті қызметінен босатуға тапсырма берген. Бұл жайлы бүгін, 20 сәуірде президенттің баспасөз хатшысы Берік Уәли Facebook парақшасында хабарлады.
"Президент Қасым-Жомарт Тоқаевтың тапсырмасы бойынша республикалық және жергілікті жолдардың құрылысы мен жөндеу жұмыстарын ретке келтіру жалғасып жатыр. Осы саладағы жұмыстарды және бақылауды босаңсытып алғаны үшін Индустрия және инфрақұрылымдық даму министрлігі Автомобиль жолдары комитетінің төрағасы С.Бармақов, Батыс Қазақстан, Солтүстік Қазақстан және Ақтөбе облыстары әкімдерінің орынбасарлары Т.Шәкімов, И.Турков және Н.Қалауовтар қызметінен босатылды. Үкімет, әкімдер, құқық қорғау органдары бюджет қаржысының тиімсіз жұмсалуының алдын алу, жол құрылысы саласындағы келеңсіздіктерді жою үшін шаралар қабылдап жатыр" делінген Уәлидің Facebook-тағы жазбасында.
Өткен аптада Тоқаев "ҚазАвтожол" ұлттық компаниясының басшысы Ұлан Әліповтің қызметінен босатқан. Сол кезде оның баспасөз хатшысы Берік Уәли Facebook-тағы парақшасында президенттің Әліповтің жұмысына көңілі толмағанын жазған еді.