فوتو: ۆۆس

ەۋرووداق ۋكراينا شەكاراسىنداعى جاعدايعا الاڭداۋشىلىق ءبىلدىرىپ، رەسەيگە ەسكەرتۋ جاسادى.

ەو سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل رەسمي مالىمدەمەسىندە: «ۋكراينامەن اراداعى شەكارادا رەسەيدىڭ 150 مىڭنان اسا اسكەري قىزمەتكەرى ورنالاستىرىلعان. بۇل شيەلەنىستىڭ ءورشىپ كەتۋ قاۋپى بار ەكەنىن بىلدىرەدى. قازىر ەكى ەل شەكاراسىنا دالا گوسپيتالدەرى قۇرىلىپ جاتىر. بۇل اقپاراتتى قايدان العانىمدى ايتا المايمىن. بىراق بۇل الاڭداتاتىن ماسەلە»، – دەدى.

وداققا مۇشە ەلدەردىڭ سىرتقى ىستەر مينيسترلەرى وتكىزگەن بەينەكونفەرەنتسيادا ۋكراينا مەن گرۋزيا پروبلەمالارى، سونداي-اق يراننىڭ يادرولىق كەلىسىمى توڭىرەگىندەگى احۋالدى تالقىلاۋ جوسپارلاعان ەدى. الايدا قاتىسۋشىلار قوسىمشا رەسەي مەن ۋكراينا شەكاراسىنداعى جاعدايعا قاتىستى ماسەلە كوتەردى. جالپى بەينەكونفەرەنتسيا قورىتىندىسى بويىنشا ەۋروداق ميانماعا قارسى سانكتسيالاردى كۇشەيتتى.

ناۋرىزدا دونباسستاعى جانجال قايتا ۋشىققان. ءتۇرلى حابارعا قاراعاندا، رەسەي اسكەرى ۋكراينا شەكاراسىنا جاقىن جەرلەرگە شوعىرلانا باستاعان. ماسكەۋ بۇل اسكەردىڭ ەشكىمگە قاۋىپ توندىرمەيتىنىن ايتادى. گەرمانيا كانتسلەرى انگەلا مەركەلمەن تەلەفون ارقىلى سويلەسكەن ۆلاديمير پۋتين ماسكەۋدىڭ بۇل قادامعا ءوز قاۋىپسىزدىگىن قامتاماسىز ەتۋ ءۇشىن بارعانىن ايتقان.

ال تhe New York Times گازەتى ماسكەۋدىڭ ۋكراينا شەكاراسىنا 4000-عا جۋىق اسكەر جىبەرگەنىن جازدى. باسىلىمنىڭ مالىمەتىنشە، رەسەي 23 ناۋرىزدا اياقتالعان اسكەري جاتتىعۋلاردان كەيىن ۋكراينا شەكاراسىنا جاقىن ايماقتان اسكەر شىعارماعاندىقتان، اقش پەن ەۋرووداق بۇل جاعدايدى قاتاڭ باقىلاۋعا العان. سەبەبى شەكاراعا اسكەر جىبەرۋ – مەملەكەتتىڭ قاۋىپسىزدىگىنە نۇقسان كەلتىرۋى مۇمكىن. سونىمەن بىرگە، الەۋمەتتىك جەلىلەردە رەسەي بريانسك، ۆورونەج جانە روستوۆ وبلىستارىنا، اننەكسيالانعان قىرىمعا دا اسكەريلەر جىبەرىپ جاتقاندىعى تۋرالى حابارلامالار جاريالاندى.

كەيىننەن ەۋرووداق پەن اقش رەسەيگە قارسى سانكتسيالاردى كۇشەيتۋدى تالقىلادى. جاڭا سانكتسيالار اياسىندا رەسەي وليگارحتارىنىڭ قاراجاتى بۇعاتتالىپ، رەسەيدىڭ SWIFT بانك جۇيەسىنەن شەتتەتىلەدى. كەشە ۇلىبريتانيا ۋكراينى قولداۋ ماقساتىندا قارا تەڭىزگە ەكى اسكەري كەمە جىبەرەتىنىن حابارلادى.

"The Qazaq Times"