وڭتۇستىك-شىعىس ازيا مەملەكەتتەرى قاۋىمداستىعى (اسەان) دجاكارتادا ميانماداعى داعدارىس بويىنشا ارنايى سامميت وتكىزەدى.

The Jakarta Post گازەتىنە سۇحبات بەرگەن يندونەزيا سىرتقى ىستەر مينيسترلىگىنىڭ رەسمي وكىلى تەۋك فايزاشياح: «ۇيىمنىڭ بيىلعى توراعا ەلى برۋنەيدەن رەسمي راستاۋدى كۇتەمىز. ميانماداعى احۋالدى تالقىلاۋ بويىنشا وتەتىن جيىندى 24 ساۋىرگە جوسپارلاپ وتىرمىز. قازىر ميانماداعى جاعداي كۇننەن كۇنگە ۋشىعىپ بارادى. ءبىز قانداي دا ءبىر شارا قولدانۋىمىز كەرەك»، – دەدى.

1 اقپاندا ميانما اسكەريلەرى ەلدە توڭكەرىس جاساپ، بيلىكتەگى اۋن سان سۋ چجي مەن بىرنەشە ساياساتكەردى ۇيقاماققا العان. اسكەريلەر بىلتىر قاراشادا وتكەن پارلامەنت سايلاۋىنىڭ ناتيجەسىمەن كەلىسپەگەن ەدى. بىلتىرعى سايلاۋدا اۋنگ سان سۋ چجي باسقاراتىن دەموكراتياشىلاردىڭ ۇلتتىق ليگاسى پارتياسى جەڭىمپاز دەپ تانىلعان. اسكەريلەر سايلاۋ ءادىل وتپەدى دەپ سانايدى.

وڭتۇستىك شىعىس ازيا ەلىن 50 جىلدان استام باسقارعان ميانما قارۋلى كۇشتەرى 2015 جىلى اۋن سان سۋ چجي بيلىككە كەلگەننەن كەيىن دە ساياسي جانە ەكونوميكالىق ىقپالىن ساقتاپ قالعان. 2017 جىلعا دەيىن ميانمانىڭ راكحاين شتاتىندا ءبىر ميلليون روحيندجا مۇسىلماندارى ءومىر سۇرگەن. بىراق حالقىنىڭ باسىم بولىگى بۋددا ءدىنىن ۇستاناتىن ميانما ولاردى زاڭسىز يمميگرانتتار دەپ، ازاماتتىق بەرۋدەن باس تارتقان. روحيندجالار ۇزاق جىلدار بويى قىسىم كورىپ كەلە جاتقاندارىنا بىرنەشە رەت شاعىمدانعان.

سول جىلى ميانمانىڭ راكحاين شتاتىندا اسكەريلەر يسلام ءدىنىن ۇستاناتىن مىڭداعان روحيندجانى ولتىرگەن. ايماقتان 700 مىڭنان استام روحيندجا ميانمامەن كورشىلەس جاتقان بانگلادەشكە قاشقان. ەل بيلىگى راكحاينداعى اسكەريلەردىڭ ارەكەتىن «ەل تاۋەلسىزدىگىنە قاۋىپ توندىرەتىن ەكسترەميستەرمەن كۇرەس» دەپ اتادى. ميانمانىڭ بۇل ارەكەتى بەيبىتشىلىك سالاسى بويىنشا نوبەل سىيلىعىن العان اۋن سان سۋ ءچجيدىڭ دە بەدەلىنە نۇقسان كەلتىردى.

"The Qazaq Times"