بۇۇ ميانما بيلىگىن روحيندجا مۇسىلماندارىنىڭ گەنوتسيدىنە قاتىستى جاۋاپقا تارتۋعا شاقىردى

ميانمانىڭ قارۋلى كۇشتەرى «گەنوتسيد» جاساۋ ماقساتىمەن روحيندجا مۇسىلماندارىن جاپپاي ءولتىرىپ، قۋعىن-سۇرگىنگە ۇشىراتتى. سونىمەن قاتار، ولاردىڭ بۇل ارەكەتتەرى ادامزاتقا قارسى قىلمىس ءارى اسكەري قىلمىس رەتىندە باعالانۋى مۇمكىن.

2016-2017 جىلدارى ميانماداعى وقيعانى جان-جاقتى زەرتتەگەن بۇۇ-نىڭ وكىلدەرى وسىنداي قورىتىندىعا كەلدى. ولاردىڭ بۇل تۋرالى ەسەپتەرى بۇگىن، 27 تامىزدا جاريالاندى. بۇۇ-نىڭ قورىتىندىسىنا سايكەس، ميانما اسكەرىنىڭ باس قولباسشىسى مەن بەس گەنەرالى اۋىر قىلمىستارى ءۇشىن جاۋاپقا تارتىلۋلارى كەرەك. بۇۇ وكىلدەرى وزدەرىنىڭ باياندامالارىندا ميانما بيلىگىنىڭ وسىنداي ارەكەتى گەنوتسيدتىڭ بەس كريتەريىنىڭ تورتەۋىنە سايكەس كەلەدى دەگەن. سەبەبى، ونىڭ اراسىندا ادام ءولتىرۋ ارەكەتتەرى، اقىل-وي جانە فيزيكالىق تۇرعىدان كۇش كورسەتۋ، تۇرعىندار توبىن جاپپاي قۇرتۋ جانە بالا تۋ جاعدايلارىنا كەدەرگى جاساۋ ارەكەتتەرى بار. ءدال وسىنداي قىساستىق ارەكەتتەرى روحيندجا مۇسىلماندارىنىڭ باسىنا كەلگەن. بۇل — ۇلتتىق، ەتنيكالىق، ناسىلدىك جانە ءدىني توپتاردى جاپپاي نەمەسە جارتىلاي قىرىپ-جويۋعا باعىتتالعان. سونىمەن قاتار، بۇۇ بايانداماسىندا ميانمانىڭ ازاماتتىق ۇكىمەتى روحيندجا مۇسىلماندارىن قۋعىن-سۇرگىنگە ۇشىراتۋ  تۋرالى قۇجاتتاردى جويىپ، ەلدە ولارعا قاتىستى تەرىس پىكىر قالىپتاستىرعان.

ەندى، وسى بايانداما بۇۇ-نىڭ ادام قۇقىقتارى جونىندەگى كەڭەسى 18 قىركۇيەكتە جەنەۆادا وتەتىن سەسسيا اياسىندا تالقىلانباق.

“The Qazaq Times”