ەۋروپارلامەنت وكىلى رەسەيگە قارسى سانكتسيالاردى قاتاڭداتۋدى ۇسىندى

ەۋروپالىق پارلامەنتتىڭ جەتەكشى فراكتسياسىنىڭ باسشىسى مانفرەد ۆەبەر ۋكراينانىڭ شىعىسىنداعى جاعدايدىڭ ۋشىعىپ، تۇزەتۋ كولونياسىندا جازاسىن وتەپ جاتقان الەكسەي ناۆالنىيدىڭ دەنساۋلىعى ناشارلاعان جاعدايدا رەسەيگە قارسى سانكتسيالاردى قاتاڭداتۋدى ۇسىندى.

Funke مەديا-توبىنا سۇحبات بەرگەن ساياساتكەردىڭ ايتۋىنشا، رەسەي مەملەكەتتەر اراسىنداعى ارانداتۋشىلىقتى جالعاستىرىپ كەلەدى. ەگەر ماسكەۋ اگرەسسيالىق ساياساتىن توقتاتپاسا، اقش پەن ەۋرووداق ەكونوميكالىق سانكتسيالاردى قاتاڭداتۋ كەرەك. سونىمەن قاتار، ساياساتكەر جاڭا سانكتسيالار اياسىندا رەسەي وليگارحتارىنىڭ قاراجاتى بۇعاتتالىپ، رەسەيدىڭ SWIFT بانك جۇيەسىنەن شەتتەتىلۋى مۇمكىن ەكەنىن ايتتى. بۇل رەسەي گازىن بالتىق تەڭىزى ارقىلى گەرمانياعا جەتكىزەتىن «سولتۇستىك اعىس-2» گاز قۇبىرىنىڭ قۇرىلىسىن قيىنداتۋى ىقتيمال.

بيىل اقپاننىڭ سوڭىنان باستاپ دونباستا اتىستى توقتاتۋ تۋرالى كەلىسىم ورەسكەل بۇزىلىپ، رەسەي-ۋكراينا قاقتىعىسى قايتا باعىت الدى. ەكى جاقتا دا قازا تاپقاندار بار. ولاردىڭ دەنى ساربازدار جانە بەيبىت تۇرعىندار دا بار. ەكى ەل اراسىنداعى جاعداي باتى ەلدەرىن الاڭداتىپ وتىر.

قازىر رەسەيدىڭ تۇراقسىزداندىرۋشى ارەكەتتەرى ۋكراينانىڭ شىعىسىنداعى شيەلەنىستى ۋشىقتىرا باستاعان. ناۋرىزدىڭ سوڭىندا تhe New York Times گازەتى ماسكەۋدىڭ ۋكراينا شەكاراسىنا 4000-عا جۋىق اسكەر جىبەرگەنىن جازدى. باسىلىمنىڭ مالىمەتىنشە، رەسەي 23 ناۋرىزدا اياقتالعان اسكەري جاتتىعۋلاردان كەيىن ۋكراينا شەكاراسىنا جاقىن ايماقتان اسكەر شىعارماعاندىقتان، اقش پەن ەۋرووداق بۇل جاعدايدى قاتاڭ باقىلاۋعا العان. سەبەبى شەكاراعا اسكەر جىبەرۋ – مەملەكەتتىڭ قاۋىپسىزدىگىنە نۇقسان كەلتىرۋى مۇمكىن. سونىمەن بىرگە، الەۋمەتتىك جەلىلەردە رەسەي بريانسك، ۆورونەج جانە روستوۆ وبلىستارىنا، اننەكسيالانعان قىرىمعا دا اسكەريلەر جىبەرىپ جاتقاندىعى تۋرالى حابارلامالار جاريالاندى.

"The Qazaq Times"