الماتىداعى ورتالىق ازيا ۋنيۆەرسيتەتى. فوتو: facebook.com

اككرەديتتەۋ جانە رەيتينگتىڭ تاۋەلسىز اگەنتتىگى (ناار/IAAR) جانە اككرەديتتەۋدىڭ تاۋەلسىز قازاقستاندىق ورتالىعى ءۇش جوعارى وقۋ ورىنىن اككرەديتتەۋ تۋرالى كۋالىگىن كەرى قايتارىپ الدى. ولار: ورتالىق ازيا ۋنيۆەرسيتەتى (الماتى), اقتاۋ گۋمانيتارلىق-تەحنيكالىق ۋنيۆەرسيتەتى (بۇرىنعى قازاقستان تەڭىز ۋنيۆەرسيتەتى) جانە «استانا» ۋنيۆەرسيتەتى. بۇل اقپاراتتى بۇگىن ءبىلىم جانە عىلىم مينيسترلىگىنىڭ ءباسپاسوز قىزمەتى حابارلادى.

ۆەدومستۆو ءباسپاسوز قىزمەتىنىڭ مالىمەتىنشە، بۇل ۋنيۆەرسيتەتتەردى اككرەديتتەۋ كۋالىگەن ايىرۋعا ولاردىڭ بىرنەشە مارتە زاڭ بۇزعانى سەبەپ بولعان. بۇعان قوسا، اتالعان وقۋ ورىندارى تۇلەكتەرىنە ديپلومدى ۋاقىتىلى بەرمەگەن.

«ەستەرىڭىزدە بولسا، ءدال وسى ءۇش جوعارى وقۋ ورنى بىزگە دە تەكسەرۋ جۇمىستارىن جۇرگىزۋگە كەدەرگى جاسادى. وسىعان دەيىن جۇرگىزىلگەن تەكسەرۋلەر ناتيجەسىندە بۇل وقۋ ورىندارىنادا بىرقاتار بۇزۋشىلىقتار انىقتالعان بولاتىن. اككرەديتاتسيالارى بويىنشا دا پروبلەمالارى بولدى. وتكەن جىلى تۇلەكتەرى ديپلومدارىن ۋاقىتىلى الا الماي قينالعان ەدى. سالدارىنان ماگيستراتۋراعا وقۋعا ءتۇسۋ نەمەسە جۇمىسقا تۇرۋعا بايلانىستى قيىندىقتارعا تاپ بولدى. وكىنىشكە قاراي، بۇل جوعارى وقۋ ورىندارىندا وقۋىن جالعاستىرىپ جاتقان ستۋدەنتتەر بۇل جاعدايدان ساباق المادى. بيىل دا كادرلاردى دايىنداۋ ساپاسىنا قاتىستى سول ماسەلەلەر كوتەرىلىپ جاتىر. ەندى بۇل وقۋ ورىندارى بۇعان دەيىن جۇرگىزگەن تەكسەرۋلەرىمىزدىڭ ناتيجەلەرى بويىنشا ءتيىستى شەشىم قابىلداۋىمىزعا كەدەرگى كەلتىرىپ، ءتۇرلى امالدارىمەن ۋاقىتتى سوزىپ جاتىر» دەدى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.

«ءبىلىم تۋرالى» زاڭعا سايكەس ليتسەنزياسىز جانە اككرەديتاتسياسىز جوعارى وقۋ ورىندارى ديپلوم بەرە المايدى.

«The Qazaq Times»