2021 جىلدان باستاپ ەلىمىزدەگى ۋنيۆەرسيتەتتەر ءوز ۇلگىسىندەگى ديپلوم بەرە باستايدى. بۇل تۋرالى وكق-دە وتكەن ءباسپاسوز ءماسليحاتىندا قر بعم ۆيتسە-ءمينيسترى اسحات ايماعامبەتوۆ مالىمدەدى.

«قازىر بارلىق جوعارى وقۋ ورىندارىندا مەملەكەتتىك ۇلگىدەگى ديپلوم بەرىلەدى. بۇل ءوز كەزەگىندە مەملەكەتتىك تۇرعىدان كەپىلدىك بەردى. ال 2021 جىلدان باستاپ ءبىزدىڭ ۋنيۆەرسيتەتتەر ءوز ۇلگىسىندەگى ديپلوم بەرە باستايدى. سول ارقىلى ۋنيۆەرسيتەت ديپلوم ءۇشىن، وزدەرىنىڭ اتاق-ابىرويى ءۇشىن ءوز اتىنان جاۋاپ بەرەتىن بولادى. مىسالى، ءال-فارابي اتىنداعى قازۇۋ ديپلومى بولسا، وعان سول ۋنيۆەرسيتەت جاۋاپ بەرەدى. سوندا جۇمىس بەرۋشى دە جوو ءبىلىم بەرۋ ساپاسى مەن دەڭگەيىنە قاراپ تۇلەكتەردى جۇمىسقا الاتىن بولادى»، - دەدى ۆيتسە-مينيستر اسحات ايماعامبەتوۆ.

سونىمەن قاتار، ءبىلىم جانە عىلىم ءمينيسترىنىڭ ورىنباسارى جوو سەرتيفيكاتتاۋ ماسەلەسىنە دە توقتالدى. ۆيتسە-ءمينيستردىڭ ايتۋىنشا، وسى سىندى  اتالعان وزگەرىستەر ەلىمىزدەگى جوو-داعى ءبىلىم ساپاسىن جاقسارتىپ قانا قويماي، ءوزارا باسەكەلەستىكتى دە كۇشەيتەتىن كورىنەدى.

دەربەس ساراپشىلاردىڭ پىكىرىنشە، ءبىلىم سالاسىنىڭ وڭ رەفورمالارىنسىز، جوو ءبىلىم بەرۋ ساپاسىن، ءبىلىم بەرۋ جۇيەلەرىن كەمەلدەندىرمەي ديپلومداردىڭ وزگەرىسى ديپلوم يەگەرىنىڭ ءبىلىم ساپاسىن كوتەرمەيتىنىن ايتادى.

“The Qazaq Times”