فوتو: REUTERS/Dado Ruvic

گەرمانيا دەنساۋلىق ساقتاۋ مينيسترلىگى AstraZeneca ۆاكتسيناسىن جاسى 60-تان اسقاندار عانا قابىلدايتىن قۇجاتقا قول قويدى. سەبەبى بۇل جاس توبىندا ەكپەدەن كەيىن اسقىنۋلار بايقالمايدى.

اتالعان كومپانيانىڭ ەكپەسىن قولدانعان سوڭ مۇندا ترومبوزدىڭ 31 دەرەگى انىقتالىپ، 9 ادام اجال قۇشقان. وسىدان كەيىن گەرمانيا ۆاكتسينانى تۇتاستاي قابىلداۋدان باس تارتتى.

كوروناۆيرۋسقا قارسى ۆاكتسيناتسيا گەرمانيادا جەلتوقساننىڭ سوڭىندا باستالدى. قازىر ەلدە Biontech-Pfizer كونسورتسيۋمى ازىرلەگەن ۆاكتسينا، سونداي-اق Moderna كومپانياسىنىڭ ەكپەسى قولدانىلادى.

جاقىندا ەۋروپانىڭ بىرقاتار ەلدەرى AstraZeneca ەكپەسىن ساتىپ الۋدان باس تارتىپ وتىر. سەبەبى، «پرەپاراتتىڭ قان اينالىمىن ناشارلاتىپ، ترومبىلاردىڭ تۇزىلۋىنە ىقپال ەتەدى» دەگەن بولجامدار ايتىلدى. كەيىننەن ەۋروپانىڭ ءدارى-دارمەك جونىندەگى اگەنتتىگى پرەپاراتتى تەكسەرە كەلە، ەكەۋىنىڭ اراسىننان بايلانىس تاپپاعانىن مالىمدەدى. ساراپشىلار ماسەلە ۆاكتسينانىڭ بەلىگىلى ءبىر پارتياسىمەن بايلانىستى بولۋى مۇمكىن دەگەن جورامالدى دا جوققا شىعاردى.

AstraZeneca ۆاكتسيناسىن سالۋدى توقتاتىپ قويعان ءبىرىنشى ەل – دانيا. بۇل شەشىم ناۋرىزدىڭ باسىندا ەكپەنى سالدىرعان بىرقاتار دانيالىقتا قان ۇيىقتارى انىقتالعان سوڭ قابىلداندى. قانىندا ۇيىقتار پايدا بولعان ازاماتتاردىڭ ءبىرى ەكپە سالدىرعاننان 10 كۇن وتكەن سوڭ قايتىس بولعان. ەلدىڭ دەنساۋلىق ساقتاۋ جونىندەگى قۇزىرلى ورگاندارى AstraZeneca ەكپەسىن قولدانۋدىڭ كەمى ەكى اپتاعا توقتاعانىن، وسى ۋاقىت ارالىعىندا تىركەلگەن جاعدايلاردىڭ تەرگەلەتىنىن مالىمدەدى. بىراق مەكەمە ۆاكتسينا مەن قان ۇيىقتارى اراسىندا بايلانىس بار دەپ قورىتۋعا ءالى ەرتە ەكەنىن ەسكەرتتى.

ەۋروپا ۆاكتسينادان بىرتىندەپ باس تارتقاندىقتان، كەشە AstraZeneca ۆاكتسيناسىنىڭ اتاۋى Vaxzevria دەپ وزگەرتىلدى. بىراق پرەپاراتتىڭ قۇرامى ەش وزگەرىسسىز قالدى.

"The Qazaq Times"