فوتو: gazeta.ru

دانيا – AstraZeneca كومپانياسى ازىرلەگەن ۆاكتسينادان تولىعىمەن باس تارتقان ەۋروپاداعى ءبىرىنشى ەل. ۆاكتسينانى قابىلداعان سوڭ تۇرعىنداردىڭ قان اينالىمى ناشارلاپ، ترومبتار تۇزىلگەن. وسىدان كەيىن دانيا بيلىگى اتالعان ۆاكتسينانى ەگۋدى توقتاتتى.

ەندى ەلدەگى ۆاكتسينالاۋ ناۋقانى Pfizer مەن Moderna كومپانيالارىنىڭ پرەپاراتتارىمەن جالعاسادى.

وسى اپتادا گەرمانيانىڭ اۋرۋلاردى باقىلاۋ اگەنتتىگى وسى ەكپەنى سالدىرعان 42 ادامدى زەرتتەپ، ولاردىڭ قانى قويۋلانعانىن انىقتاعان. سوندىقتان گەرمانيا بيلىگى «استرازەنەكا»-نى جاسى 60-قا تولماعان ازاماتتارعا سالماۋ تۋرالى شەشىم قابىلدادى. سونداي-اق نورۆەگيانىڭ مەملەكەتتىك اقپارات قۇرالى مەديتسينالىق زەرتتەۋ ناتيجەسىندە كوروناۆيرۋسقا قارسى ەگىلگەن 5 ادامنىڭ قانى ۇيىپ، ترومبوتسيتتەر تابىلعانىن مالىمدەدى. بىراق دانيادان باسقا مەملەكەتتەر ازىرگە AstraZeneca كومپاياسىمەن جاسالعان كەلىسىمشارتتىڭ كۇشىن جويعان جوق.

ەۋروپالىق دارىلىك زاتتار اگەنتتىگى (EMA) 29 قاڭتاردا AstraZeneca ۆاكتسيناسىن قولدانۋ تۋرالى شەشىم قابىلداعان. ماماندار پرەپاراتتى 18 جاستان 64 جاسقا دەيىنگى ادامدارعا قويۋعا بولاتىندىعىن راستادى. الايدا، ونىڭ 65 جاستان اسقان ادامدار ءۇشىن ءتيىمدى بولاتىندىعى تۋرالى مالىمەتتەر جەتكىلىكسىز.

15 ناۋرىزدا نيدەرلاند بيلىگى AstraZeneca ەكپەسىنىڭ جاناما اسەرى تۋرالى حابارلانعاننان كەيىن، وسى پرەپاراتپەن حالىقتى ۆاكتسيناتسيالاۋ پروتسەسىن توقتاتىپ تاستاعان ەدى. ال وعان دەيىن يرلانديا، يسلانديا، دانيا جانە نورۆەگيا وسىنداي شەشىم قابىلداعان بولاتىن.

ماماندار AstraZeneca ەكپەسىمەن قاتار، بەلگيالىق Janssen (Johnson & Johnson برەندىنە تيەسىلى) كومپانياسى وندىرگەن كوروناۆيرۋسقا قارسى ەكپەدەن باس تارتۋعا شاقىرىپ وتىر. كەشە اقش-تا ازىق-تۇلىك پەن ءدارى-دارمەك ساپاسىن باقىلاۋ باسقارماسى مەن اۋرۋلاردى باقىلاۋ ورتالىعى Johnson & Johnson كومپانياسىنىڭ ۆاكتسيناسىن قولدانۋدى توقتاتۋدى ۇسىندى. اتالعان ەكپەنى قابىلداعان 6 ادامدا قاننىڭ ۇيۋى تىركەلىپ، بىرەۋى كوز جۇمعان. وسى ماسەلەگە بايلانىستى بۇگىن اۋرۋلاردى باقىلاۋ جانە الدىن الۋ ورتالىعىنىڭ يممۋنداۋ تاجىريبەسى جونىندەگى كوميتەتى شۇعىل وتىرىس وتكىزەدى.  بىراق قاننىڭ ۇيۋى ناقتى نەدەن بولعانى ازىرگە دالەلدەنگەن جوق. اقش-تا قازىرگە دەيىن تۇرعىندارعا وسى ۆاكتسينانىڭ 6,8 ميلليون دوزاسى سالىنعان.

الەمدە Janssen مەن Novavax ەكپەسى ءۇشىنشى سىناق كەزەڭىنەن ءوتىپ، ناتيجەسىن رەسمي تۇردە جاريالاعان بەس ۆاكتسينانىڭ قاتارىنا ەنگەن. بۇعان دەيىن Pfizer/BioNTech (اقش/گەرمانيا), Moderna (اقش), Oxford/AstraZeneca (ۇلىبريتانيا) ەكپەلەرى سىناق كەزىندە جوعارى تيىمدىلىك كورسەتكەن. ءۇش ەكپە دە الەمنىڭ ءبىراز ەلىندە ماقۇلداندى. رەسەيلىك سپۋتنيك-V ەكپەسى دە بىرنەشە مەملەكەتتە ماقۇلداندى. Pfizer/BioNTech ەكپەسى مەن Moderna ۆاكتسيناسىنىڭ تيىمدىلىگى 95% دەپ حابارلاندى. ال Oxford/AstraZeneca ۆاكتسيناسىنىڭ تيىمدىلىگى 62-90% دەپ جاريالاندى.

"The Qazaq Times"