ەۋروپالىق وداق شىڭجاڭداعى مۇسىلماندارعا قىسىم جاساعانى ءۇشىن قىتايعا سانكتسيا سالدى. وداققا مۇشە 27 ەلدىڭ قارا تىزىمىنە قىتايدىڭ ءتورت شەنەۋنىگى جانە مەملەكەتتىك ءبىر مەكەمە ەنگەن. 

قارا تىزىمگە ەنگەندەر ەۋروپا وداعىنا كىرە المايدى جانە اكتيۆتەرى بۇعاتتالادى.

بۇعان دەيىن اقش-تىڭ ەكس-مەملەكەتتىك حاتشىسى مايك پومپەو قىتايدىڭ شىڭجاڭداعى ارەكەتىن گەنوتسيد دەپ تانىدى. كەيىننەن قىتاي ءسىم امەريكالىق شەنەۋنىكتەرگە سانكتسيا ەنگىزەتىنىن ايتتى. بەيجىڭ بيلىگىنىڭ شىڭجاڭداعى ارەكەتتەرىن گەنوتسيد دەپ تانۋ – ترامپ ۇكىمەتىنىڭ بيلىكتەن كەتەر الدىندا قىتايعا قارسى سوڭعى شاراسى. شىڭجاڭداعى از ساندى ۇلتتارعا جاسالعان قىسىمدار مەن بەيجىڭنىڭ ادام قۇقىقتارىن اۋىر دارەجەدە بۇزۋ ارەكەتتەرى كوپتەگەن ەلدەردە تالقىلانىپ كەلدى.

2018 جىلدىڭ تامىزىندا بۇۇ ادام قۇقىقتارى جونىندەگى جوعارعى كوميسسار باسقارماسىنىڭ وكىلدەرى شىڭجاڭداعى تۇزەتۋ لاگەرلەرىندە 1 ملن-عا جۋىق مۇسىلمانجاردىڭ زاڭسىز ۇستالعانىن جانە ادام قۇقىقتارىنىڭ تاپتالعانىن مالىمدەدى. باسقارما بۇل جاعدايعا الاڭداۋشىلىق ءبىلدىرىپ، وسى ايماققا باقىلاۋشىلار جىبەرۋدى ۇسىندى.

قىتاي بيلىگى شىڭجاڭدا پەنيتەنتسيارلىق مەكەمەلەردىڭ اۋقىمدى جەلىسىن قۇرۋ تۋرالى اقپاراتتى بىرنەشە رەت جوققا شىعاردى. سونىمەن قاتار، 2018 جىلدىڭ سوڭىندا ولار وڭىردە ءبىلىم بەرۋ جانە كاسىپتىك دايارلاۋ ورتالىقتارى جۇمىس ىستەيتىنىن حابارلاعان. قىتاي شەنەۋنىكتەرىنىڭ مالىمدەۋىنشە، وندا تەرروريزم مەن ەكسترەميزم يدەيالارىنىڭ ىقپالىنا تۇسكەن، قىتاي ءتىلىن، جازۋ نەگىزدەرىن، كوممۋنيكاتيۆتىك داعدىلاردى جانە قحر زاڭناماسىنىڭ نەگىزدەرىن وقيتىن ادامدار بار. بۇل ورتالىقتارداعى ادامداردىڭ ناقتى سانىن قىتاي بيلىگى جاسىرىن ۇستاپ وتىر.

"The Qazaq Times"