نيكوليا ساركوزي سوتقا شاقىرىلدى

2 ناۋرىزدا فرانتسيانىڭ ەكس-پرەزيدەنتى نيكوليا ساركوزي ءۇش جىلعا باس بوستاندىعىنان ايىرىلدى. وسى اپتادا ول تاعى دا سوت الدىندا جاۋاپ بەرمەك.

بۇل جولى 66 جاستاعى ساياساتكەر 2012 جىلعى سايلاۋدىڭ ۇگىت-ناسيحات شارالارىنا بولىنگەن قارجىنى ماقساتسىز جۇمساپ، جىمقىردى دەپ ايىپتالىپ وتىر. نيكوليا ساركوزي سايلاۋالدى ناۋقانعا بولىنگەن سومانى 24 ميلليون دوللارعا اسىرعان.

ۇلتتىق قارجى پروكۋراتۋراسى بىلتىر جەلتوقساندا ساركوزيدى ءتورت جىلعا باس بوستاندىعىنان ايىرۋدى تالاپ ەتتى (ولاردىڭ ەكەۋى شارتتى تۇردە). پروكۋراتۋرا ءوزىنىڭ بۇرىنعى ادۆوكاتى تەرري ەرزوگ پەن كونستيتۋتسيالىق سوتتىڭ بۇرىنعى سۋدياسى گيلبەرت ازيبەرگە دە وسىنداي جازا قولدانۋدى تالاپ ەتكەن. 2013 جىلى سوت ساركوزيدى جەمقورلىق ءىسى بويىنشا اقتاپ شىعارعان. بىراق باسقا ءىستى تەكسەرۋ كەزىندە ونىڭ ادۆوكاتپەن اڭگىمەسى جازىلىپ، ەكس-پرەزيدەنتكە قارسى جاڭا ايعاقتار پايدا بولعان.

2017 جىلى دا نيكوليا ساركوزيدىڭ باسى داۋعا قالعان. سول جىلى ساركوزي «FIFA جەمقورلىق داۋىنىڭ بەلدى قاتىسۋشىلارىنىڭ ءبىرى» دەگەن كۇدىككە ءىلىندى. اتاپ ايتقاندا، ول 2022 جىلى الەم چەمپيوناتىن وتكىزۋ مارتەبەسىن كاتارعا جەڭىپ الۋعا كومەكتەسكەنى ءۇشىن بىرنەشە زاڭسىز قارجى وپەراتسيالارىن جاساعان. FIFA جەمقورلىق داۋىن تەكسەرۋشى توپتىڭ زەرتتەۋلەرى بويىنشا، نيكوليا ساركوزي كاتارعا پسج (پاري سەن-جەرمەن) فۋتبول كلۋبىن، Qatari Diar ينۆەستيتسيالىق  كومپانياسىنا فرانتسيالىق كوممۋنالدى قىزمەت تۇرلەرىن كورسەتەتىن كومپانيانى ساتقان.

بۇدان بولەك FIFA باسشىلىعى بۇعان دەيىن دە فرانتسيانىڭ ەكس-پرەزيدەنتىن جەمقورلىققا بارۋ ارقىلى كاتارعا 2022 جىلى الەم چەمپيوناتىن وتكىزۋ قۇقىعىن جەڭۋگە كومەكتەستى دەپ ايىپتاعان بولاتىن.

"The Qazaq Times"