فوتو: ار

ەۋروپا ەلدەرىندە كوروناۆيرۋس دەرەگى بويىنشا احۋال ءارتۇرلى: كەي ەلدەر كارانتيندىك شەكتەۋلەردى جەڭىلدەتىپ، قالىپتى ومىرگە كوشە باستاسا، كەي مەملەكەتتەردە پاندەميانىڭ ءۇشىنشى تولقىنى باستالىپ كەتتى.

ۆيرۋستىڭ الدىن الۋ ءۇشىن وتكەن دۇيسەنبىدەن باستاپ چەحيادا مەكتەپتەر مەن دۇكەندەر جابىلدى. اۋرۋحانالاردا ورىن از بولعاندىقتان، چەحيا بيلىگى ناۋقاستاردى پولشاعا جىبەرۋگە ءماجبۇر. قازىر بۇل مەملەكەتتە ەۋروپادا ۆيرۋس جۇقتىرۋ دەرەگى بويىنشا انتيرەكورد ورناعان – سوڭعى 14 كۇندە ميلليون ادامعا شاققاندا 15 مىڭ جاعداي تىركەلگەن. سالىستىرمالى تۇردە الىپ قاراساق، ۇلىبريتانيادا بۇل كورسەتكىش ميلليون ادامعا 1440 جاعدايدى قۇرايدى. حالىقتىڭ باسىم بولىگى كوروناۆيرۋسپەن اۋىرعاندىقتان، ەلدە ۆاكتسيناتسيا جۇرگىزۋ قاجەت ەمەس دەپ سانايتىن يممۋنولوگتار بار. سەبەبى، چەحيادا ۇجىمدىق يممۋنيتەت قالىپتاسۋعا جاقىن.

پولشاداعى احۋال دا ءماز ەمەس. وسى اپتادا قاراشادان بەرى العاش رەت ەڭ جوعارى كورسەتكىش تىركەلدى – ءبىر كۇندە 17 260 كەيس انىقتالعان. ال ۆەنگريادا جاڭا جاعدايلاردىڭ سانى جەلتوقسانداعى دەرەكتەرمەن تەڭەلدى – كۇنىنە 6 مىڭنان استام ادام اۋىرادى.

مۇنداعى ءولىم-ءجىتىم دەڭگەيى دە جوعارى. ۆەنگريانىڭ باس سانيتار دارىگەرى سەسيليا ميۋللەر احۋالدىڭ «وتە اۋىر» ەكەنىن ايتتى. ال پرەمەر-مينيستر ۆيكتور وربان اۋرۋحاناداعى ناۋقاستار سانى 8 مىڭنان 20 مىڭعا دەيىن ءوسۋى مۇمكىن دەيدى. ۆەنگريا رەسەيدىڭ «سپۋتنيك V» ۆاكتسيناسىن ماقۇلداعان ەو-نىڭ العاشقى ەلى بولدى. قازىرگە دەيىن حالىقتىڭ شامامەن 10%-ى ۆاكتسينا قابىلداعان.

سلوۆاكيادا دا ۆيرۋس دەرەگى ارتقان. سەيسەنبىدە ەلدىڭ پرەمەر-ءمينيسترى يگور ماتوۆيچ ەۋرووداققا رەسەيلىك ۆاكتسينانى ماقۇلداۋدى تەزدەتۋگە شاقىردى. كەيىننەن سلوۆاتسيا ۇكىمەتى اليانستاعى كورشىلەرگە ەسكەرتۋسىز «سپۋتنيك V» ۆاكتسيناسىنىڭ ەكى ميلليون دوزاسىن ساتىپ الدى.

فرانتسيا – ءبىرىنشى تولقىن كەزىندە قاتتى زارداپ شەككەن ەل. رەانيماتسياداعى پاتسيەنتتەردىڭ سانى ءالى ازايعان جوق. سارسەنبىدە تاعى 264 ادام قايتىس بولدى. جاعداي وتە الاڭداتارلىق دەگەن فرانتسيا بيلىگى جاپپاي ۆاكتسيناتسيالاۋ ارقىلى ۆيرۋستىڭ الدىن الامىز دەيدى. ۆاكتسيناتسيا باستالعالى مۇندا 67 ميلليون حالىقتىڭ تەك 2 ميلليونى ەكپە قابىلداعان.

العاشقى تولقىن الەۋمەتتىك، ەكونوميكالىق جاعدايىنا اۋىر سوققى بولعان ەۋروپانىڭ تاعى ءبىر ەلى يسپانيادا ۆيرۋس دەرەگى، كەرىسىنشە، كۇرت تومەندەدى قاڭتاردىڭ سوڭىندا 100 مىڭ ادامعا شاققاندا 900-گە جۋىق جاعداي تىركەلدى. ال 10 ناۋرىزدا 153 كەيس انىقتالدى.

جاقىندا يسپانيادا بارلىق دەنساۋلىق ساقتاۋ قىزمەتكەرلەرى: اۋرۋحانالاردان ەمحانالارعا دەيىن، قارتتار ۇيلەرىنەن جەدەل جاردەم مەدبيكەلەرىنە دەيىن ەرەۋىلگە شىقتى. ولار 35 ساعاتتىق ءۇزىلىسسىز جۇمىستان شارشاعانىن ايتىپ، بيلىكتەن دارىگەرلەردىڭ جاعدايىن جاقسارتۋدى تالاپ ەتتى.

يتاليادا كۇن سايىن تىركەلەتىن جاڭا ينفەكتسيالاردىڭ سانى اقپانىڭ ورتاسىنان باستاپ وسە باستادى. قازىر جالپى دەرەكتەر سانى 22 409 بولدى – بۇل ءبىر كۇن بۇرىنعى دەرەكتەن 3 مىڭعا كوپ.

پاندەميا باستالعاننان بەرى مۇندا 100 811 ادام كوروناۆيرۋستان قايتىس بولدى. سونىمەن قاتار، Istat ۇلتتىق ستاتيستيكا باسقارماسى يتاليادا ورتاشا ءومىر ءسۇرۋ ۇزاقتىعىنىڭ 2020 جىلى شامامەن ءبىر جىلعا (82,3 جاس) قىسقارعانىن حابارلادى. 2019 جىلى يتاليا وسى كورسەتكىش بويىنشا ەۋروپالىق وداقتا ءبىرىنشى ورىندا بولعان.

ۇلىبريتانيادا ۆيرۋس قارقىنى باسەڭدەپ، وقۋشىلار وفلاين وقۋعا كوشە باستادى. ال گەرمانيا كانتسلەرى بۇعان دەيىن انگەلا مەركەل كارانتين رەجيمىن 28 ناۋرىزعا دەيىن ۇزارتقان بولاتىن. قازىر ەلدە ۆيرۋستىڭ تارالۋ قارقىنى باسەڭدەي باستاعان. وسىعان بايلانىستى گۇل دۇكەندەرى، ءسان سالوندارى مەن جاتتىعۋ زالدارى قايتادان اشىلدى.

جاڭا ەرەجەگە ساي، 100 مىڭ تۇرعىنعا شاققاندا ناۋقاستار سانى 50 ادامنان اسپاعان وڭىرلەردە مۋزەيلەر، گالەرەيالار، باقتار، كىتاپ جانە گۇل ساتاتىن دۇكەندەر، سونداي-اق باۋ-باقشا زاتتارىنا ارنالعان بازارلار اشىلادى. تەك تۇتىنۋشىلار كەلەتىنىن الدىن الا ەسكەرتۋى ءتيىس. سونىمەن قاتار، كەلەسى اپتادان باستاپ COVID-19 ۋشىقپاعان جاعدايدا تەاترلار، كونتسەرت، وپەرا زالدارىنا جانە كينوتەاترلارعا بارۋعا رۇقسات بەرىلمەك.

"The Qazaq Times"