ارمەنيا پرەمەر-ءمينيسترى نيكول پاشينيان. فوتو: ار

ارمەنيادا نارازىلىق كوڭىل-كۇيى كۇن وتكەن سايىن ارتىپ بارادى. بۇگىن ەل پرەمەر-ءمينيسترى نيكول پاشينيان وپپوزيتسيا وكىلدەرىن مەرزىمنەن بۇرىن وتەتىن پارلامەنتتىك سايلاۋعا قاتىسۋعا شاقىردى.

سونىمەن قاتار، ول ەرەۆانداعى رەسپۋبليكا الاڭىندا وتكەن ميتينگ كەزىندە ۇكىمەتىنىڭ جىبەرگەن قاتەلىكتەرى ءۇشىن حالىق الدىندا كەشىرىم سۇرادى. قازىر ەل استاناسىندا پاشينياننىڭ جاقتاستارى مەن وپپوزيتسيا ەكىگە ءبولىنىپ ميتينگتەر وتكىزىپ جاتىر.

حالىققا مالىمدەمەسىندە پاشينيان: «ءوز قاتەلىكتەرىم ءۇشىن ارمەنيا حالقىنىڭ الدىندا كەشىرىم سۇرايمىن. ساياسي كۇشتەر ءبىزدىڭ ۇسىنىستارىمىزبەن كەلىسسە كەزەكتەن تىس ساياسي دودا وتكىزۋگە دايىنبىز. حالىق بۇل مۇمكىندىكتى پايدالانادى دەپ ويلايمىن. پارلامەنت وپپوزيتسياسىن مەرزىمنەن بۇرىن وتەتىن پارلامەنتتىك سايلاۋعا قاتىسادى دەپ ويلايمىن»، – دەدى.

بىلتىر ءازىربايجان مەن ارمەنيا اراسىندا التى اپتاعا سوزىلعان تاۋلى قاراباق ءۇشىن قاقتىعىستان كەيىن پاشينياننىڭ وتستاۆكاسىن تالاپ ەتكەندەر سانى ارتقان. وتكەن اپتادا ارمەنيا قارۋلى كۇشتەرىنىڭ باس شتابى پرەمەر-مينيستر نيكول پاشينياننىڭ وتستاۆكاعا كەتۋىن ەتكەن. اسكەريلەردىڭ بۇل تالابىنا وپپوزيتسيالىق «وتاندى قۇتقارۋ قوزعالىسى» قولداۋ ءبىلدىردى.

وپپوزيتسيالىق بىرلەستىكتىڭ حابارلاماسىندا: «وتاندى قۇتقارۋ قوزعالىسى» جوعارى كوماندالىق قۇرامنىڭ پاشينياندى وتستاۆكاعا كەتىرۋ تۋرالى ءوتىنىشىن قۇپتايدى. ءبىز ارميان حالقىن بوستاندىق الاڭىنا جينالىپ، قارۋلى كۇشتەر مەن اسكەرلەردى قولداۋعا شاقىرامىز»، – دەلىنگەن.

قۇجاتتا قارۋلى كۇشتەر ەلدىڭ قاۋىپسىزدىگى مەن بىرلىگىنىڭ كەپىلى ەكەنى ايتىلعان. بۇل جاعدايعا باس شتاب باسشىسىنىڭ ءبىرىنشى ورىنباسارىنىڭ قىزمەتىنەن بوساتىلۋى سەبەپ. پرەمەر-مينيستر پاشينياننىڭ جوعارى لاۋازىمدى قىزمەتكەردى ورنىنان كەتىرۋ تۋرالى ۇسىنىسىنى ارمەنيا پرەزيدەنتى ارمەن ساركيسان ماقۇلداعان. ەندى وسىعان بايلانىستى قارۋلى كۇشتەر نيكول پاشينيانمەن قوسا ۇكىمەتتىڭ دە وتستاۆكاعا كەتۋىن تالاپ ەتتى. ال پاشينيان مۇنى «اسكەري توڭكەرىس» دەپ اتادى.

"The Qazaq Times"