فوتو: Vlast.kz

الماتىدا «دەموكراتيالىق پارتيا» قۇرعىسى كەلەتىن باستاماشىل توپ وكىلدەرىن ارنايى جاساق قورشاۋعا الىپ، رەسپۋبليكا الاڭىنا قاراي شەرۋگە شىعۋعا مۇمكىندىك بەرمەدى. قالاداعى ورتالىق ساياباقتا پوليتسيا شەرۋگە شىققان 50 شاقتى ادامدى كۇشپەن ۇستاپ اكەتتى.

28 اقپان قازاقستاندا ميتينگ وتكىزۋگە ەكى وپپوزيتسيالىق توپ شاقىرعان. ءبىرى – «قازاقستاننىڭ دەموكراتيالىق پارتياسىن» قۇرۋ جونىندەگى باستاماشىل توپ. ال ەكىنشىسى – قازاقستاندا زاڭسىز دەپ تانىلعان، بىراق ەۋروپارلامەنت «بەيبىت ۇيىم» دەپ اتاعان «قازاقستاننىڭ دەموكراتيالىق تاڭداۋى» قوزعالىسى. ميتينگ كۇنى استانادا دا، الماتىدا دا ارنايى جاساق قويىلىپ، ينتەرنەت بۇعاتتالدى.

شەرۋ باستالعاننان بەرى الماتىداعى ورتالىق ستاديون اۋماعىندا ءموبيلدى ينتەرنەت جۇمىس ىستەمەيدى. كەتتلينگ ادىسىمەن قورشاۋعا الىنعان بەلسەندىلەر «نازارباەۆ، كەت!» دەپ ۇراندادى. ال «ماماي – قارابەت» دەگەن 10 شاقتى ادام ارنايى جاساقتىڭ سىرتىندا ءجۇر. قورشاۋدا قالعان «ەكى ادامنىڭ قابىرعاسى سىنعانى» ايتىلىپ، جەدەل جاردەم شاقىرىلدى.

شەرۋدە ون شاقتى بۇركەنگەن بيلىكشىل سپيكەرلەر ءجۇر. ولار بيلىكتىڭ ساياساتىن جاقتاپ، اكتسياعا شىعۋشىلاردى قارالاپ باعۋدا. سونداعى نارازىلاردىڭ ءبىرى «كوزىلدىرىك تاققان، بيلىك ءسوزىن سويلەپ تۇرعاندار – نۇر وتان مۇشەلەرى» دەيدى.

ابدۋلليندەر كوشەسىنىڭ قيىلىسىندا اۆتوموبيلدەرگە ارنالعان جول دا جابىق; ساياباققا جاقىن جەردە پوليتسيا ءتىپتى جاياۋ جۇرگىنشىلەرگە جول بەرمەيدى. ساياباق ايماعىنداعى دۇكەندەر مەن مەيرامحانالار جابىق.

سونىمەن قاتار، قدت قوزعالىسىنىڭ جاقتاۋشىلارى جينالۋدى جوسپارلاپ وتىرعان ساياباققا كىرە بەرىستە ورتالىق مادەنيەت جانە دەمالىس ساياباعى تازالىق كۇنىنە جابىق دەگەن حابارلاندىرۋ بار. مۇندا قوعامدىق كولىكتەر دە جۇرمەيدى: تروللەيبۋستاردىڭ باعىتى وزگەرتىلگەن. ءموبيلدى ينتەرنەت بۇل اۋداندا دا جۇمىس ىستەمەيدى.

"The Qazaq Times"