پۋتينمەن جاقىن تانىس ادام اقش بارلاۋ قىزمەتىن باسقارماق

اقش-تىڭ ورتالىق بارلاۋ اگەنتتىگىنە (CIA) جاڭا جەتەكشى كەلمەك. بايدەن ۇسىنعان اتالعان ماڭىزدى بارلاۋ ۇيىمىن باسقارۋى مۇمكىن دەگەن بولجامدار بار. بايدەن ۇسىنعان ۋيليام بەرنستىڭ بۇرىن رەسەيدە ەلشى بولعانى اقپارات قۇرالدارىنىڭ نازارىن اۋدارىپ وتىر.

ۋيليام بەرنس 2005-2008 جىلدار اراسىندا قۇراما شتاتتاردىڭ رەسەيدەگى باس ەلشىسى بولعان. ورىس پەن اراب تىلىندە جاتتىق سويلەيتىن ديپلومات ءوزىنىڭ رەسەيدەگى قىزمەتى كەزىندە پۋتين مەن ونىڭ اينالاسىنداعى مەملەكەت جەتەكشىلەرىمەن جاقسى تانىس بولعان دەلىنەدى. اق ءۇي جەتەكشىسى بايدەن ونى ورتالىق بارلاۋ اگەنتتىگىنە ۇسىنىس ەتكەننەن كەيىن تانىمال ءارى ىقپالدى باسىلىم The New York Times باسىلىمىنا مالىمدەمە سيپاتتى ماقالا جاريالاپتى. بۇل جازباسىندا بەرنس رەسەي مەن قىتايدان كەلەتىن قاۋىپ-قاتەرلەرگە باسا كوڭىل ءبولۋ تۋرالى ەسكەرتۋ جاساعان.

قازىر اقش سەناتى بەرنستىڭ كانديداتۋراسىن قاراستىرىپ جاتىر. ونىڭ جازباسىنىڭ مازمۇنى مەن بايدەننىڭ ۇسىنىس ەتۋىنە قاراي وتىرىپ، الداعى ۋاقىتتا اقش بارلاۋ قىزمەتىن باسقارۋى بەك مۇمكىن دەپ وتىر. تانىمال باسىلىمدا ول رەسەيدى «دەرجاۆا اتاعىنان ايىرىلىپ قالعان ەل» الايدا «ءالى دە قاۋىپ قاتەرگە يە» دەپ باعالاپتى. ول ءوسىپ كەلە جاتقان جانە كەيىن كەتكەن «دەرجاۆالاردىڭ» قاتەرى ۇقساس ەكەنىن، بۇل اسىرەسە كيبەر شابۋىلدار ارقىلى كوبىرەك كورىنىپ جاتقانىن ايتقان.

“The Qazaq Times”