Hong Guang Mini ەلەكتر كولىكتەرى. فوتو: xinlang.

قىتايدىڭ ارزان ەلەكتر كولىكتەرى يلون ماسكتىڭ Tesla كومپانياسىن تىعىرىققا تىرەگەلى تۇر. قىتايدىڭ SAIC Motor اتتى مەملەكەتتىك كومپانياسى وندىرگەن ەلەكتر قوزعالتقىشتى كولىكتەرى نەبارى 4500 اقش دوللارىنا ساتىلىپ، نارىقتا سۇرانىسقا يە بولدى.

اتالعان قىتايدىڭ ۇلتتىق كومپانياسى Hong Guang Mini دەپ اتالاتىن شاعىن كولىكتەردى اقش-تىڭ General Motors كومپانياسىمەن بىرلەسە وتىرىپ شىعارۋدا. Hong Guang Mini ساعاتتىق قارقىنىن 100 شاقىرىمعا جەتكىزە الادى. ونىڭ قازىرشە ەكى ءتۇرلى نۇسقاسى بار، ءبىرى 4500 اقش دوللارى بولسا، ەندى ءبىرى 5000 دوللارعا باعالانادى. قىتاي اقشاسىمەن شامامەن 30 مىڭ يۋان بولاتىن بۇل كولىكتەر ءداستۇرلى اۆتوكولىكتەردىڭ كوبىنەن ارزان جانە بۇل سومانى باسىم كوپ قىتايلىقتاردىڭ قالتاسى كوتەرەدى.  قىتايدا وتاندىق ءونىم رەتىندە كۇشتى سۇرانىسقا يە بولىپ، قاڭتار ايىنىڭ وزىندە «تەسلا» كولىكتەرىنەن ەكى ەسە كوپ ساتىلۋدا.

قورشاعان ورتاعا زيانسىز سانالاتىن كولىكتەر قىتاي ءۇشىن اسا ماڭىزدى. بۇل قىتايداعى داعدارىسقا جاقىن تۇرعان ەكولوگيا ماسەلەسىنە دە اسەر ەتپەك. سوندىقتان قىتاي ۇكىمەتى ەلەكتر قوزعالتقىشتى كولىكتەرگە مەملەكەتتىك قولداۋدى جەتەرلىك بەرىپ وتىر. ەڭ كەمىندە ونى ساتىپ الۋشىعا مەملەكەتتىك كولىك نومەرىن تەگىن ۇسىنادى. قىتايداعى قاتىناس-تاسىمال كولىكتەرىن باسقارۋ ەرەجەلەرىنە ساي ءوز كولىگىنە نومەر الۋ اسا قيىن. بۇل ەلدەگى جەكە كولىكتەردىڭ سانىن شەكتەۋ ءۇشىن دە قيىنداتىلعان. ءتىپتى، شاڭحاي، بەيجىڭ سەكىلدى بىرنەشە ون ميلليون حالىق تۇراتىن قالالاردا كولىك نومەرىن الۋ بىرنەشە جىل ۋاقىتتى الادى.

ءبىر سوزبەن ايتقاندا، قىتايلىق SAIC Motor ءوزىنىڭ ەلەكتر كولىك سالاسىنداعى ارىپتەستەرىنە ۇلكەن قورقىنىش الىپ كەلدى. ول الىپ قىتاي نارىعىن جاۋلاۋمەن قاتار بولاشاقتا الەمدىك نارىقتا دا سۇرانىسقا يە بولۋى مۇمكنى دەگەن بولجامدار بار.

“The Qazaq Times”