كەشە كەشكىسىن سايتىمىزدىڭ رەداكتسياسىنا ءبىر وقىرمان حابارلاستى. ايتۋعا قاراعاندا، جەتىساي-الماتى باعىتىندا اۆتوۋبسپەن كەلە جاتقان جولاۋشىلار، سارىاعاش-شىمكەنت جولى بويىنداعى سامسا ساتاتىن ورىندا كەلەڭسىز ىسكە كۋا بولعان.   

جولدا توقتاعان اۆتوبۋستىڭ جولاۋشىلارى تاندىر باسىنا ۇيمەلەپ، سامسا ساتىپ الادى. ارادا ءبىراز وتكەندە ولاردىڭ بىرەۋى ساماسنىڭ ىشىنەن قۇمىرىسقا شىققانىن ايتىپ، دابىل قاققان. سونىمەن، ساتىپ العانداردىڭ ءبارى سامسالاردى اشىپ تەكسەرە باستاعاندا، ىشىنەن نە ەكەنى بەلگىسىز قاپ-قارا زات شىققان. ادەتتەگى مالدىڭ ەتىنە ۇقسامايتىن بولعان سوڭ، ولار دەرەۋ پوليتسياعا حابار بەرەدى. بىرنەشە ادام سامسانى جەپ ۇلگەرگەن ەكەن.

اشۋلانعان جۇرت بۇنىڭ نەدەن جاسالعانىن بىلمەك بولىپ ساتۋشىنى قىسىمعا العاندا، ساتۋشى وزبەك ايەلى ءوزىنىڭ ەشنارسەدەن حابارسىز ەكەنىن ايتىپ شىرىلدايدى. جولاۋشىلار سامسا جاساپ وتىرعانداردان ءىستىڭ ءمان-جايىن بىلمەك بولعاندا، اسحاناداعى ەكى جىگىت قاشىپ ۇلگەرىپتى.

كوپ وتپەي سامساحانانىڭ يەسى دە كەلگەن. ول جولاۋشىلاردان كەشىرىم سۇراپ، ءبارىنىڭ اقشاسىن قايتارىپ بەرەتىنىن، سامساحانانى ەندى مۇلدە جاباتىنىن ايتقانىمەن، بۇل ءىستى اياقسىز قالدىرعىسى كەلمەگەن جۇرت پوليتسيانى كۇتەدى. كوپ وتپەي بولىمشە پوليتسەيى مەن تەرگەۋ توبى دا جەتتى. ارىز جازىلىپ، سامسالار ساراپتاماعا جىبەرىلەتىن بولىپتى. ارى قارايعى ىسپەن قۇقىق قورعاۋ ورىندارى اينالىسپاق.

«قازىر اقشا تابۋعا دانىككەن ادامدار «اڭقاۋ ەلگە ارامزا مولدا» بولعىسى كەلەدى، بۇعان تەكسەرۋ ورىندارىنىڭ سالعىرتتىعى دا سەبەپ بولىپ تۇر. باسقا ادامدار دا اباي بولسىن دەگەن نيەتپەن، بۇل ءىستى ادەيى حابارلاسىپ ايتىپ تۇرمىن» دەيدى تەلەفون شالعان ازامات. سوعان قوسا ءوزى تۇسىرگەن اۋەسقوي ۆيدەو، فوتوسىن دا جىبەرىپتى.

“The Qazaq Times”