سوۆەتتىك ەسكى جۇيەدەن ارىلۋ: ۋكراينا تمد-عا تيەسىلى كەلىسىمدەردەن شىقتى

ۋكراينا تمد اياسىندا قول قويىلعان ازاماتتىق اۆياتسيا جانە اۋە كەڭىستىگىن پايدالانۋ تۋرالى كەلىسىمنەن شىقتى.

رەسمي قۇجاتتا: «پرەزيدەنت ۆلاديمير زەلەنسكي ۋكراينانىڭ تاۋەلسىز مەملەكەتتەر دوستاستىعى شەڭبەرىندە جاسالعان حالىقارالىق شارتتاردان شىعۋ تۋرالى № 70/2021 جارلىققا قول قويدى»، – دەلىنگەن. ياعني ۋكراينا 1991 جىلى 25 جەلتوقساندا قول قويىلعان ازاماتتىق اۆياتسيا جانە اۋە كەڭىستىگىن پايدالانۋ تۋرالى كەلىسىمنەن جانە 1992 جىلى 15 مامىردان كۇشىنە ەنگەن اۋە كەڭىستىگىن پايدالانۋ تۋرالى كەلىسىمنەن شىققان.

2014 جىلى اقپانداعى ۋكرايناداعى توڭكەرىستەن كەيىن ەلدىڭ جاڭا باسشىلىعى تمد-داعى كەلىسىمشارتتاردى بۇزۋ پروتسەسى باستالدى دەدى.

2018 جىلى تامىزدا ۋكراينانىڭ سول كەزدەگى پرەزيدەنتى پەتر پوروشەنكو ۇكىمەتكە تمد-نىڭ بارلىق قۇرىلتاي ورگاندارىنان رەسمي تۇردە شىعۋ ءراسىمىن باستاۋدى تاپسىرعان. ول سونداي-اق «ۋكراينانىڭ ۇلتتىق مۇددەسىنە تيتتەي بولسا دا قايشى كەلەتىن ۇيىم اياسىنداعى كەز كەلگەن حالىقارالىق شارتتان شىعاتىنىن» مالىمدەگەن.

2019 جىلى ۋكراينا سوۆەت كەزىندە جاسالعان قۇپيا ونەرتابىستار تۋرالى اقپاراتتى جاريا ەتپەۋ تۋرالى قۇجات پەن ەكونوميكالىق وداقتىڭ ورتاق ستاتيستيكالىق بازاسىن قۇرۋ كەلىسىمىنەن شىققان.

العاشقى قۇجاتقا 1999 جىلى 4 ماۋسىمدا رەسەي، ۋكراينا، بەلارۋس، ارمەنيا، گرۋزيا، قازاقستان، قىرعىزستان، مولدوۆا، تاجىكستان مەن وزبەكستان قول قويعان. ەلدەر «سسسر كەزىندە جاسالعان قۇپيا ونەرتابىستار جايلى وزدەرىندە بار دەرەكتەردى جاريا ەتپەۋگە» كەلىسكەن.

كەلىسىمنەن شىعۋ يدەياسىن كوتەرگەن ۋكراينا ەكونوميكالىق دامۋ مينيسترلىگى قۇجاتتىڭ ەسكىرگەنىن ايتىپ، «كەلىسىمدەر تمد-عا كىرەتىن ەلدەردىڭ قازىرگى قارىم-قاتىناسىنا ساي كەلمەيدى» دەپ مالىمدەگەن.

ەكىنشى كەلىسىم 1995 جىلدىڭ 10 اقپانىنان بەرى قولدانىستا بولعان. قۇجاتتا تمد ستاتيستيكالىق كوميتەتىن قۇرۋ جانە مەملەكەتتەر اراسىندا دەرەكتەر الماسۋ ءۇشىن ەكونوميكالىق وداقتىڭ جالپى ستاتيستيكالىق بازاسىن جۇرگىزۋ قاراستىرىلعان.

"The Qazaq Times"