ۋكراينا وپپوزيتسياسى زەلەنسكيگە يمپيچمەنت جاريالادى

جوعارعى راداداعى «وپپوزيتسيالىق پلاتفورما – ءوءمىر ءۇشىن» فراكتسياسى  ۋكراينا پرەزيدەنتى ۆلاديمير زەلەنسكيگە يمپيچمەنت جاريالاماق. وسى اپتادا پارتيا توتەنشە سەز وتكىزىپ، يمپيچمەنت پروتسەسىن باستايدى. بۇل تۋرالى اتالعان پارتيانىڭ توراعاسى ۆاديم رابينوۆيچ مالىمدەدى. ەلدىڭ وپپوزيتسيالىق پارتياسى پرەزيدەنت «دەموكراتياعا قارسى ۇكىم شىعاردى» دەپ سانايدى.

دەپۋتات رابينوۆيچ: «ۋكراينانىڭ تاۋەلسىزدىك تاريحىندا بيلىك العاش رەت ءۇش جەتەكشى اقپاراتتىق ارنانىڭ قىزمەتىن توقاتتى. زەلەنسكيدىڭ توبى شىندىق اقپاراتتى اشىق جەتكىزەتىن جۋرناليستەردىڭ اۋزىن جاپقىسى كەلەدى. زەلەنسكي حالىققا جانە ەۋروپالىق ەركىندىك ۇستانىمىنا قارسى شىقتى. پرەزيدەنت مىرزا، ءسىز وپپوزيتسياعا توسقاۋىل بولا المايسىز!»، – دەدى.

ءبىر كۇن بۇرىن زەلەنسكي ءۇش تەلەارناعا – «112 ۋكراينا»، ZIK جانە NewsOne-عا سانكتسيا ەنگىزۋ تۋرالى شەشىم شىعارعان.  ياعني پرەزيدەنت 3 بىردەي تەلەارنا باسشىسى ءارى وپپوزيتسيالىق پارتيا وكىلىنە قارسى 5 جىلعا سانكتسيالار سالدى. بۇل شەشىمدى جوعارعى رادا دەپۋتاتتارىنىڭ كوبى قولداعان. سالدارىنان 3 تەلەارنا قىزمەتىن توقتاتتى.

شەكتەۋلەردەن كەيىن ليتسەنزيالاردىڭ كۇشى جويىلۋى مۇمكىن جانە تەلەباعدارلامالاردى رەترانسلياتسيالاۋدى ۋاقىتشا توقتايدى. تەلەارنالاردىڭ اكتيۆتەرىن بۇعاتتاۋ، كاپيتالدى ەلدەن شىعارۋعا تىيىم سالۋ، ەكونوميكالىق جانە قارجىلىق مىندەتتەمەلەردى توقتاتۋ، باعالى قاعازدارمەن مامىلەلەر جاساۋعا تولىق نەمەسە ءىشىنارا تىيىم سالۋ، ۋكراينا ۇلتتىق بانكىنىڭ شەتەلدىك ينۆەستيتسيالاردى جۇزەگە اسىرۋعا جانە شەتەلدە قاراجات ورنالاستىرۋعا رۇقساتتارى مەن ليتسەنزيالارىن قايتارىپ الۋ قاراستىرىلعان. زەلەنسكيادىڭ سانكتسيالارىنان كەيىن تەلەارنالاردىڭ ەفيرلىك حابار تاراتۋى توقتاتىلدى.

سانكتسياعا ىلىنگەن تەلەارنانىڭ ءبىرى ۋكرايناداعى «وپپوزيتسيالىق پلاتفورما – ءومىر ءۇشىن» پارتياسىنىڭ وكىلى، جوعارعى رادا دەپۋتاتى تاراس كوزاكقا تيەسىلى. دەپۋتات مۇلىك پايدالانۋ جانە بيلىك ەتۋ، ساۋدا وپەراتسيالارىن جۇرگىزۋ، ۋكراينا اۋماعىندا رەسۋرستاردى تاسىمالداۋ، ترانزيتتەۋ قۇقىعىنان بەس جىلعا شەتتەتىلەدى. سونداي-اق كاپيتالدى ۋكراينادان تىس جەرلەرگە شىعارۋعا تىيىم سالىنادى.

"The Qazaq Times"