اقش-تا مەملەكەتتىك تۋ تومەن ءتۇسىرىلدى

اقش-تا كوروناۆيرۋستان قايتىس بولعان ازاماتتاردى ازا تۇتۋ 5 كۇنگە جالعاسادى. وسىعان بايلانىستى اقش-تىڭ فەدەرالدى جانە اسكەري نىساندارىندا مەملەكەتتىك تۋ تومەن ءتۇسىرىلدى.

ەل پرەزيدەنتى دجو بايدەن تىكەلەي ەفيردە: «بۇگىن بىزدە وتە قارالى، جانعا باتارلىق كەزەڭ – 500 071 ادام قايتىس بولدى. پاندەميانىڭ ءبىر جىلىندا اجال قۇشقان امەريكالىقتار سانى ءبىرىنشى دۇنيەجۇزىلىك سوعىستى، ەكىنشى دۇنيەجۇزىلىك سوعىستى جانە ۆەتنام سوعىسىن قوسا العانداعى سانعا قاراعاندا – كوپ»، – دەدى.

سونىمەن قاتار، بايدەن كوروناۆيرۋس ىندەتىنەن كوز جۇمعان امەريكانىڭ 500 مىڭ حالقىن 1 مينۋت ۇنسىزدىكپەن ەسكە الىپ، وتانداستارىن الدەبىر تۇسىنىسپەۋشىلىكتەردى كەيىنگە قالدىرىپ، پاندەميامەن بىرلەسىپ كۇرەسۋگە شاقىردى.

الەمدە كوروناۆيرۋس جۇقتىرعاندار سانى 112 ميلليوننان اسىپ، 2,47 ميلليون ادام اجال قۇشقان. قازىر ءولىم-ءجىتىم سانىنىڭ 18%-دان استامى امەريكادا تىركەلگەن.

"The Qazaq Times"