ۆلاديمير زەلەنسكيدىڭ ماقۇلداۋىمەن ۋكراينا ۇلتتىق قاۋىپسىزدىك كەڭەسى رەسەيلىك جەكە جانە زاڭدى تۇلعالارعا سانكتسيا ەنگىزدى.

«ۋكراينفورم» مالىمەتىنشە، تىزىمگە 19 زاڭدى تۇلعا كىرگەن. ونىڭ ىشىندە كومپانياسى سينگاپۋردە تىركەلگەن رەسەيلىك «سپورتماستەر» دۇكەندەر جەلىسى، «بيوتەك» فارماتسەۆتىك حولدينگى، سەۆاستوپول مەملەكەتتىك ۋنيۆەرسيتەتى، مۇناي ونىمدەرىن ازىرلەيتىن نوۆوشاحتينسك زاۋىتى، «دونسكيە ۋگلي» ساۋدا ءۇيى بار. اتالعان كومپانيالاردىڭ بىرقاتارى رەسەيشىل ۋكراينالىق ساياساتكەر ۆيكتو مەدۆەدچۋككە تيەسىلى.

بۇل حاباردان كەيىن ۆلاديمير ءپۋتيننىڭ ءباسپاسوز حاتشىسى دميتري پەسكوۆ زەلەنسكيدىڭ شەشىمىن «دونباسستا اسكەري شەشىمگە اكەلۋى مۇمكىن الاڭداتارلىق شەشىم» دەگەن مالىمدەمە جاسادى. سەبەبى سانكتسيالىق تىزىمدەگىلەرگە ۋكراينا اۋماعىندا ساۋدا وپەراتسيالارىن جۇرگىزۋگە، رەسۋرستاردى تاسىمالداۋدا تىيىم سالىنادى.

رەسەيگە قارسى سانكتسيالار – مەملەكەتكە، قىرىمدى اننەكسيالاۋعا، ۋكراينانىڭ شىعىسىنداعى جاعدايدى تۇراقسىزداندىرۋعا قاتىسى بار ادامدار مەن ۇيىمدارعا قاتىستى شەكتەۋ شارالارى.

2014 جىلى ناۋرىزدىڭ ورتاسىندا رەسەي قىرىمدى اننەكسيالاعاننان كەيىن اقش، ەۋروپالىق وداق، اۆستراليا، جاڭا زەلانديا جانە كانادا العاشقى سانكتسيالار پاكەتىن ەنگىزدى. بۇل شارالار اكتيۆتەردى توقتاتۋدى جانە سانكتسيالار تىزىمىنە ەنگىزىلگەن ادامدارعا ۆيزالىق شەكتەۋلەر ەنگىزۋدى، سونداي-اق سانكتسيالار سالعان ەلدەردىڭ كومپانيالارىنا تىزىمگە ەنگىزىلگەن ۇيىمدارمەن ىسكەرلىك قارىم-قاتىناس جاساۋعا تىيىم سالۋدى قاراستىرادى.

سانكتسيالاردىڭ ارتۋى ۋكراينانىڭ شىعىسىنداعى جاعدايدىڭ شيەلەنىسۋىمەن بايلانىستى بولدى. قاتاڭ شەكەتۋلەردى ەنگىزگەن مەملەكەتتەر رەسەيدى ۋكراينانىڭ اۋماقتىق تۇتاستىعىن بۇزىپ، رەسەيلىك كوتەرىلىسشىلەرگە قارۋ-جاراق جەتكىزگەنى ءۇشىن ايىپتادى.

2018 جىلدىڭ تامىزىندا جانە بيىل اقش مەملەكەتتىك دەپارتامەنتى مەن ەۋرووداق ماسكەۋگە قارسى جاڭا سانكتسيالار دايىنداۋ تۋرالى جاريالادى. ونى ەنگىزۋدىڭ سەبەبى – ۇلىبريتانياداعى تىڭشى سەرگەي سكريپالدىڭ جانە كرەمل سىنشىسى الەكسەي ناۆالنىيدىڭ «نوۆيچوك» حيميالىق قارۋىنان ۋلانۋى ەدى.

"The Qazaq Times"