اقش «دەموكراتياعا قايشى ارەكەت ەتكەن» بەلارۋس شەنەۋنىكتەرىنە سانكتسيا ەنگىزدى

امەريكا اكىمشىلىگى 43 بەلارۋس ازاماتىنا، ونىڭ ىشىندە جوعارى دارەجەلى لاۋازىمدى تۇلعالارعا «ادام قۇقىعىن تاپتاپ، دەموكراتياعا قايشى ارەكەت ەتكەنى» ءۇشىن سانكتسيالار ەنگىزۋ تۋرالى شەشىم قابىلدادى. بۇل تۋرالى اقش مەملەكەتتىك حاتشىسى ەنتوني بلينكەن مالىمدەدى.

رەسمي قۇجاتتا: «بۇگىن اقش مەملەكەتتىك دەپارتامەنتى پرەزيدەنتتىڭ شەشىمىمەن بەلارۋستەگى احۋالدىڭ ۋشىعۋىنا جاۋاپتى 43 جەكە تۇلعاعا ۆيزالىق شەكتەۋلەر ەنگىزۋ بويىنشا شارالار قابىلدادى. ياعني ولار امەريكا قۇراما شتاتتارىنا كىرۋ قۇقىعىنان ايىرىلادى»، – دەلىنگەن.

قارا تىزىمگە «ادىلەت» سەكتورىنىڭ جوعارى دارەجەلى شەنەۋنىكتەرى، قۇقىق قورعاۋ ورگاندارىنىڭ باسشىلارى، سونداي-اق بەيبىت دەمونسترانتتاردى قاماۋعا العان قۇزىرەتتى ورگانداردىڭ قىزمەتكەرلەرى، نارازىلىق اكتسياسىنا قاتىسۋشىلار مەن تاۋەلسىز جۋرناليستەردى تۇرمەگە قاماۋ ۇكىمىن شىعارعان سۋديالار مەن پروكۋرورلار، مانيفەستاتسيالارعا قاتىسقان ستۋدەنتتەرگە قارسى شارا قولدانعان جوعارى وقۋ ورىندارىنىڭ اكىمشىلىك قۇرامى ەنگىزىلدى.

اقش سىرتقى ساياسات باسقارماسى باسشىسىنىڭ ايتۋىنشا، بەلارۋس بيلىگى نارازىلىق بىلدىرۋشىلەرگە، ازاماتتىق قوعام بەلسەندىلەرىنە جانە جۋرناليستەرگە زورلىق-زومبىلىق قولدانۋىن توقتاتار ەمەس.

بۇعان دەيىن اقش ۇكىمەتى قازىرگى شەكتەۋدى ەكى رەت ەنگىزگەن بولاتىن. سول كەزدە 66 ادام قارا تىزىمگە ەنگىزىلگەن. سوعان قاراماستان، بەلارۋستەگى نارازىلىق شەرۋلەرىنە قاتىسۋشىلاردى ءتىنتۋ، باسىپ جانشۋ جالعاسىپ جاتىر. بلينكەننىڭ مالىمدەمەسىندە اقش بەلارۋستىڭ ازاماتتىق قوعامىنا قولداۋ بىلدىرەتىنىن جانە ەل بيلىگى زاڭعا قايشى ارەكەت ەتۋىن توقتاتپاسا، شەكتەۋ شارالارىن قاتاڭداتاتىنى ايتىلدى.

كۇنى كەشە مينسك سوتى «بەلسات» پولياك تەلەارناسىنىڭ جۋرناليستەرى كاتەرينا اندرەەۆا مەن داريا چۋلتسوۆتى 15 قاراشادا بولعان نارازىلىقتان تىكەلەي رەپورتاج جاساعانى ءۇشىن ەكى جىلعا باس بوستاندىعىنان ايىردى. جۋرناليستەر تاراپىنان مەملەكەتتىك كەشىرىم سۇرالسا دا، بەلارۋس بيلىگى ولاردىڭ قۇجاتىن قاراۋدان باس تارتقان. سوت ايىپتاۋدىڭ تولىق نۇسقاسىن قابىلدادى. قوس جۋرناليست «ماتەريالدارىمەن جاپپاي تارتپسىزدىك ۇيىمداستىردى» دەگەن ايىپپەن ەكى جىلعا قامالدى.

17 اقپاندا بەلارۋستە پوليتسيا ونداعان جۋرناليست پەن قۇقىق قورعاۋشىلارعا ءتىنتۋ جۇرگىزگەن بولاتىن. ءتىنتۋ ەلدىڭ بارلىق وبلىس ورتالىقتارىندا – مينسك، برەست، گومەل جانە باسقا ايماقتاردا تاڭەرتەڭ باستالعان. ناتيجەسىندە، بەلگىسىز سەبەپتەرمەن ەكى ادام قاماۋعا الىنعان. مينسكىدە ولار بەلارۋس جۋرناليستەر قاۋىمداستىعىنىڭ باسشىلىعىنا دا ءتىنتۋ جۇرگىزدى. كەيىننەن پوليتسيا ۇيىمنىڭ كەڭسەسىنە دە باردى. بۇل تاۋەلسىز ۇيىم 1995 جىلى بەلارۋس جۋرناليستەرىنىڭ رەسمي وداعىنا قارسى قۇرىلعان.

ال گومەلدە سەگىز تاۋەلسىز جۋرناليست پەن قۇقىق قورعاۋشىلار، موگيلەۆتە ەكى جۋرناليست جانە «ۆەسنا» رتالىعىنىڭ ەكى ايماقتىق قىزمەتكەرىن تەكسەردى. ساراپشىلار بەلارۋس بيلىگىنىڭ بۇل قادامىن «ءسوز بوستاندىعىنا قايشىلىق جانە ديكتاتۋرانىڭ ايقىن كورىنىسى» دەپ سانايدى.

"The Qazaq Times"