ءشومىشباي ساريەۆ ومىردەن ءوتتى

اتى الاشقا تانىمال اقىن ءشومىشباي ساريەۆ 75 جاسقا قاراعان شاعىندا دۇنيەدەن وزدى. 70-80 جىلدارى قازاق ادەبيەتىنە جاڭا لەپپەن كەلگەن اقىن، وسە كەلە قازاق دالاسىنا كەڭىنەن جايىلعان اندەردىڭ ءماتىنىن جازدى.

ءشومىشباي ساريەۆ 1946 جىلى 15 ساۋىردە قىزىلوردا وبلىسى، ارال اۋدانى، ءشومىش ستانساسىندا دۇنيەگە كەلگەن. قامباش ورتا مەكتەبىن بىتىرىسىمەن، قازالى اۋداندىق «لەنين تۋى» جانە ارال اۋداندىق «تولقىن» گازەتتەرىندە قىزمەت اتقارعان. 1971 جىلى قازمۋ-ءدىڭ جۋرناليستيكا فاكۋلتەتىن بىتىرگەن. 1970–1974 جىلدارى «قازاقستان» باسپاسىندا رەداكتور، «جۇلدىز» جۋرنالىندا ءبولىم مەڭگەرۋشىسى، قازاقستان رەسپۋبليكاسى ۇعا-نىڭ م.و.اۋەزوۆ اتىنداعى ادەبيەت جانە ونەر ينستيتۋتىندا عىلىمي قىزمەتكەر، اعا عىلىمي قىزمەتكەر بولعان. 1996 جىلى «قازىرگى قازاق ليريكاسىنىڭ ىزدەنىستەرى» اتتى تاقىرىپتا عىلىم كانديداتى دارەجەسىن يەلەندى. «XX عاسىردىڭ جيىرماسىنشى جىلدارداعى پوەزياسى» اتتى مونوگرافيا جازعان.

«عاشىقتار جىرى»، «بوزجورعا» اتتى اۆتورلىق بەينەتاسپاسى جارىق كوردى. گ.گۋليا، و.بەرگگولتس، ي.اباشيدزە، س.ۆيكۋلوۆ، ا.دەمەنتەۆ، ف.اليەۆا، ر.روجدەستۆەنسكي، م.ەمينەسكۋ، ت.ب. اقىنداردىڭ ولەڭدەرىن قازاق تىلىنە اۋدارعان.

العاشقى جىر جيناعى 1974 جىلى «بالداۋرەن» دەگەن اتپەن جارىق كورگەن. سودان بەرگى ارالىقتا قازاق، ورىس تىلدەرىندە ون بەس شاقتى كىتابى شىقتى. 1994 جىلى «جازۋشى» باسپاسىنان تاڭدامالى ولەڭدەر تومدىعى، 1992 جىلى «ءسۇيىنشى» دەگەن اتپەن ءان ولەڭدەرى جەكە جيناق بوپ باسىلعان. فر.كافكا اتىنداعى حالىقارالىق سىيلىقتىڭ لاۋرەاتى (2003). «تارلان» سىيلىعىنىڭ يەگەرى (2004). قازاقستاننىڭ ەڭبەك سىڭىرگەن قايراتكەرى.

شىعارمالارى: ارايلى كوكتەم. ا.، 1975; تەڭىزدەن سوققان جەل. ا.، 1975; تاعدىر. ا.، 1976; زاۋلا تۇلپار. ا.، 1979; ۋاقىت. ا.، 1979; ءوڭ مەن ءتۇس. ا.، 1980; ءۇش ولشەم. ا.، 1982; تاعدىر جىرى. ا.، 1984; ءبىزدىڭ عاسىر. ا.، 1989; تاماشا، تاماشا، تاماشا. ا.، 1989; ساعىنىشىم-تەڭىز. ا.، 1994; تاڭدامالى ولەڭدەر جيناعى. ءى توم. ا.، «جازۋشى»، 1992.

"The Qazaq Times"