Aqın Şömişbay Sariev. Foto: kitap.kz

Atı alaşqa tanımal aqın Şömişbay Sariev 75 jasqa qarağan şağında dünieden ozdı. 70-80 jıldarı qazaq ädebietine jaña leppen kelgen aqın, öse kele qazaq dalasına keñinen jayılğan änderdiñ mätinin jazdı.

Şömişbay Sariev 1946 jılı 15 säuirde Qızılorda oblısı, Aral audanı, Şömiş stansasında düniege kelgen. Qambaş orta mektebin bitirisimen, Qazalı audandıq «Lenin tuı» jäne Aral audandıq «Tolqın» gazetterinde qızmet atqarğan. 1971 jılı QazMU-diñ jurnalistika fakul'tetin bitirgen. 1970–1974 jıldarı «Qazaqstan» baspasında redaktor, «Jwldız» jurnalında bölim meñgeruşisi, Qazaqstan Respublikası WĞA-nıñ M.O.Äuezov atındağı Ädebiet jäne öner institutında ğılımi qızmetker, ağa ğılımi qızmetker bolğan. 1996 jılı «Qazirgi qazaq lirikasınıñ izdenisteri» attı taqırıpta ğılım kandidatı därejesin ielendi. «XX ğasırdıñ jiırmasınşı jıldardağı poeziyası» attı monografiya jazğan.

«Ğaşıqtar jırı», «Bozjorğa» attı avtorlıq beynetaspası jarıq kördi. G.Gulia, O.Berggol'c, I.Abaşidze, S.Vikulov, A.Dement'ev, F.Alieva, R.Rojdestvenskiy, M.Eminesku, t.b. aqındardıñ öleñderin qazaq tiline audarğan.

Alğaşqı jır jinağı 1974 jılı «Baldäuren» degen atpen jarıq körgen. Sodan bergi aralıqta qazaq, orıs tilderinde on bes şaqtı kitabı şıqtı. 1994 jılı «Jazuşı» baspasınan tañdamalı öleñder tomdığı, 1992 jılı «Süyinşi» degen atpen än öleñderi jeke jinaq bop basılğan. Fr.Kafka atındağı halıqaralıq sıylıqtıñ laureatı (2003). «Tarlan» sıylığınıñ iegeri (2004). Qazaqstannıñ eñbek siñirgen qayratkeri.

Şığarmaları: Araylı köktem. A., 1975; Teñizden soqqan jel. A., 1975; Tağdır. A., 1976; Zaula twlpar. A., 1979; Uaqıt. A., 1979; Öñ men tüs. A., 1980; Üş ölşem. A., 1982; Tağdır jırı. A., 1984; Bizdiñ ğasır. A., 1989; Tamaşa, Tamaşa, Tamaşa. A., 1989; Sağınışım-teñiz. A., 1994; Tañdamalı öleñder jinağı. İ tom. A., «Jazuşı», 1992.

"The Qazaq Times"