بىلتىر ءححى عاسىر باستالعالى قازاقستان تاريحىنداعى «ەڭ قاسىرەتتى» جىل بولعانىن جىلدىق ءولىم ستاتيتسيكاسىنان بايقاۋعا بولادى. 2020 جىلى 162,5 مىڭنان استام ادام ومىردەن وتسە، الدىڭعى جىلى ستاتيستيكا بۇدان 30 مىڭعا كەم ەدى.
توقاەۆتىڭ ەكىنشى جولداۋىمەن وتكەن كۇزدە قۇرىلعان ستراتەگيالىق جوسپارلاۋ جانە رەفورمالار اگەنتتىگىنىڭ قاراماعىنا ەكونوميكا مينيسترلىگىنەن اۋىسقان ۇلتتىق ستاتيستيكا بيۋروسىنىڭ دەرەگىنە قاراعاندا، بىلتىرعى ادام ءولىمى الدىڭعى جىلدان كەمىندە 20%-عا ارتقان. بىلتىر كوز جۇمعان 163 613 ادامنىڭ ءولىمى قازاقستان ءۇشىن جاڭا جۇزجىلدىقتاعى ەڭ جوعارى كورسەتكىش.
2020 جىل الەم حالقى كوروناۆيرۋس پاندەمياسىنا ۇشىراپ، ءومىر ءسۇرۋ سالتى ايتارلىقتاي وزگەردى. ءجۇز مىڭداعان ادام تىكەلەي ۆيرۋستىڭ كەسىرىنەن قايتتى. سونىڭ اراسىندا قازاقستان دا دەنساۋلىق ساقتاۋ جۇيەسىنىڭ دايىنسىزدىعىنان «ماۋسىم-شىلدە قىرعىنىنا» تاپ بولدى. سالدارىنان اۋرۋحانالاردا مامان، وتتەك قورى جانە ناۋقاستاردى قابىلدايتىن ورىن جەتىسپەي، ەل ءدارىحانالاردىڭ الدىندا ساعاتتار بويى قالىڭ كەزەكتە تۇردى. سابىلعان جۇرت ءدارى-دارمەككە دەر كەزىندە قول جەتكىزە المادى. ءتىپتى جەدەل جاردەم قىزمەتى جۇكتەمەنىڭ اۋىرلاۋىنان بارلىق شاقىرتۋعا ۇلگەرمەگەن كۇندەر ءوتتى. دەرت دەندەگەن شاقتا اۋرۋحانالار مەن ەمحانالاردا جوسپارلى ەمدەلۋ-پروفيلاكتيكا شارالارى شەتىن قالىپ، سوزىلمالى اۋرۋلارعا شالدىققان باسقا ناۋقاستار قاجەتتى مەديتسينالىق قىزمەتتەردەن قاعىلعانى ەسىمىزدە.
ۇكىمەتتىڭ جازدىگۇنى جول بەرىپ العان «حالىقتىق تراگەديانىڭ» سۋىق ءىزىن شىلدە جانە تامىز ايلارىنداعى ستاتيستيكادان انىعىراق كورىنەدى. شىلدەدە ءتۇرلى سەبەپتەن 28 178, الدىڭعى جىلى ءدال وسى ايدا 12 420 ادام قايتىس بولعان. بىلتىر تامىز ايىندا 2019 جىلعا سول ارالىقتاعى ۋاقىتقا قاراعاندا 7358-گە ارتىق ءولىم جاعدايى تىركەلگەن.
دەنساۋلىق ساقتاۋ مينيسترلىگى الەمدە پاندەميا رەجيمى جاريالانعان كۇننەن بەرى كوروناۆيرۋس ستاتيستيكاسىن بىرنەشە رەت وزگەرتىپ، توقاەۆتان ءۇش مارتە ەسكەرتۋ العان. دەسە دە ءالى كۇنگە دەيىن مەديتسينا سالاسىنداعى ەسەپ تولىقتاي جولعا قويىلماي كەلەدى. ددسۇ-نىڭ شىلدە ايىنداعى كونسۋلتاتيۆتى سىنىنان كەيىن 1 تامىزدان باستاپ كوروناۆيرۋستان بولەك ونىڭ پنەۆمونيالىق ءتۇرىن (كۆي- نەمەسە U07.2) ەسەپتەۋ قولعا الىنعان ەدى. الەكسەي تسويدىڭ كومانداسى بۇعان دەيىنگى جارتى جىلدان استام ۋاقىتقا تيەسىلى، ادەتتەگىدەن ءۇش ەسەگە ۇلعايعان پنەۆمونيانىڭ اراسىنان كوروناۆيرۋستى انىقتاۋعا قۇلىقسىزدىق تانىتىپ، شىنايى ستاتيستيكانى قالىپقا كەلتىرۋدەن باس تارتقان.
رەسمي ەسەپ بويىنشا، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 199 مىڭنان، 1 تامىزدان بەرگى كوروناۆيرۋس پنەۆمونياسى 48 مىڭنان اسىپ، جالپى اۋىرعاندار سانى 247.5 مىڭعا جەتكەن. سونىمەن قوسا، 2020 جىلعى ناۋرىز ايىنان بەرى قازاقستاندا ۆيرۋس جۇققانداردىڭ 4278-ءى (كۆي+ / U07.1 – 2626, كۆي- / U07.2 – 591, ىلەسپە اۋرۋلاردان – 1061) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1061 ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنشە، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.
تاۋەلسىز ساراپشىلار مەن بەلسەندى دارىگەرلەر كۇرت وسكەن ءولىمنىڭ باسىم بولىگى كوروناۆيرۋستان ەكەنىن ايتادى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟