قر قارجى مينيسترلىگىنىڭ عيماراتى. فوتو: اشىق دەرەككوز

مەملەكەتتىك كىرىستەر كوميتەتىنىڭ قىزمەتكەرلەرى ارنايى كيىم ۇلگىسىمەن قايتا جاساقتالىپ، ءارى  جالاقىسى ارتتىرىلماق. كوپشىلىك اتىنان تۇسكەن شاعىم نەگىزىندە بيزنەستەرگە تەكسەرۋگە قويىلعان موراتوري الىنىپ تاستالادى. بۇل تۋرالى جاڭادان تاعايىندالعان قارجى ءمينيسترى ەرۇلان جاماۋباەۆ بۇگىنگى ۇكىمەت وتىرىسىندا مالىمدەدى.

«سىبايلاس جەمقورلىققا قارسى ءىس-قيمىل اگەنتتىگى مەن «ادالدىق الاڭى» جوبالىق كەڭسەسى مەملەكەتتىك كىرىستەر قىزمەتكەرلەرىنىڭ ەڭبەكاقىنىڭ تومەندىگىنەن، الەۋمەتتىك قورعالماۋىنان جانە جوعارى جاۋاپكەرشىلىككە بايلانىستى سىبايلاس جەمقورلىققا ۇشىراۋ قاۋپى بار ەكەنىن حابارلادى»، –  دەيدى مينيستر جاماۋباەۆ.

ونىڭ ايتۋىنشا، وسى سەبەپتى ءبىلىمى مەن بىلىگى جەتىك، تاجىريبەلى ماماندار جەكە سەكتورعا كەتىپ جاتىر. قىزمەتكەرلەرىنىڭ «ءحالى مۇشكىل» دەگەن قارجى مينيسترلىگى «بازالىق جالاقىعا ۇستەماقى رەتىندە سىنىپتىق شەندەردى جانە بىرىڭعاي فورما ۇلگىسىن بەكىتۋدى» ۇسىندى.

«اتالعان تەتىكتەر جوعارى بىلىكتى كادرلار مەن ساباقتاستىقتى ساقتاۋعا، سىبايلاس جەمقورلىقتى ازايتۋعا، سونداي-اق مەملەكەتتىك كىرىس ورگاندارىنىڭ مارتەبەسىن ارتتىرۋعا مۇمكىندىك بەرەدى»،  – دەپ ەسەپتەيدى مينيستر.

سونىمەن قاتار، ول قازاقستاندا بىلتىردان باستاپ بيزنەستى تەكسەرۋگە موراتوري ەنگىزىلگەنىن ەسكە الىپ، ونىڭ ناتيجەسىنە كوڭىلى تولمايتىنىن ءسوز ەتتى.

كاسىپكەرلىك سالانىڭ كەڭ تىنىستاۋىن جاقتىرماعان جاماۋباەۆ «جوسىقسىز كاسىپكەرلەر بۇل باستامانى سالىقتان جازاسىز جالتارۋ مۇمكىندىگى رەتىندە قابىلدادى»، – دەدى.

مينيستر ۇسىنعان مالىمەتكە قاراعاندا، 2020 جىلى «ازاماتتىق باقىلاۋ: چەكتى تالاپ ەت!»  جوباسى اياسىندا كوميتەتكە زاڭبۇزۋشىلىق فاكتىسى بويىنشا 16,5 مىڭ بەينە-شاعىم تۇسكەن. سونداي-اق، موراتوري سەبەبىنەن سالىق ورگاندارى شارا قولدانا الماعان 7 مىڭ ارىز تىركەلگەن. وسىنى العا تارتقان مينيستر موراتوري جايلى جارلىقتىڭ ءبىر بولىگىن ازاماتتاردىڭ شاعىمى نەگىزىندە تەكسەرىس جۇرگىزۋگە مۇمكىندىك بەرەتىندەي ەتىپ وزگەرتۋدى قولعا الىپتى.

"The Qazaq Times"