فوتو: inbusiness.kz

قازاقستاننىڭ اۆياتسيالىق اكىمشىلىگى Boeing 737 MAX اۋە كەمەسىنىڭ ۇشۋعا دايىندىعىن تەكسەرۋدى باستادى.

ازاماتتىق اۆياتسيا كوميتەتى تاراتقان مالىمدەمەدە: «سوڭعى ءۇش اي ىشىندە قازاقستاننىڭ اۆياتسيالىق اكىمشىلىگى SCAT اۆياكومپانياسىمەن بىرلەسىپ Boeing 737 MAX ۇشاعىن ىسكە قوسۋعا دايىندىق جۇرگىزۋدە. اۆياتسيالىق اكىمشىلىك اۆياكومپانيالارعا ترەنينگتەر وتكىزۋگە، ءوندىرۋشىنىڭ جاڭارتىلعان ەرەجەلەرىن ۇستانۋعا، سونداي-اق ۇشۋ كەزىندە جانە ەشەلوندا جىلدامدىق اسپاپتارى دۇرىس كورسەتىلمەگەن جاعدايدا ەكيپاجداردىڭ ءىس-قيمىلدارىن ترەناجەرلىك دايارلاۋ باعدارلاماسىنا ەنگىزۋگە كەڭەس بەردى»، – دەلىنگەن.

قازاقستانعا كەلگەن SCAT ينجەنەرلىك-اۆياتسيالىق قىزمەتى جانە Boeing كومپانياسىنىڭ تەحنيكالىق ماماندارى اۋە كەمەسىن قايتا ىسكە قوسۋدىڭ جانە باعدارلاماسىن ۇسىنعان. SCAT ۇشقىشتارى الەمنىڭ سەرتيفيكاتتالعان جاتتىعۋ ورتالىقتارىنىڭ بىرىندە دايىندىقتان ءوتتى، ال الداعى اپتادا Boeing 737 MAX ۇشاعىن تەستىلەۋ جۇرگىزىلەدى.

قازىر اقش پەن قازاقستاننىڭ اۆياتسيالىق بيلىك ورىندارىنىڭ تالاپتارىنا سايكەس ۇشا تەكسەرۋ بويىنشا قورىتىندى كەزەڭدە. اۋە كەمەسىنىڭ ۇشۋعا جارامدىلىعىن باعالاۋ بويىنشا سەرتيفيكاتتىق تەكسەرۋدى 2021 جىلعى اقپاندا جۇرگىزۋ جوسپارلانىپ وتىر. «قازاقستاننىڭ اۆياتسيالىق اكىمشىلىگى» اق اۋە كەمەسىنىڭ كوممەرتسيالىق ۇشۋلاردى قالپىنا كەلتىرۋگە دايىندىعىن تەكسەرمەك.

2019 جىلدىڭ ناۋرىزدا ازاماتتىق اۆياتسيا كوميتەتى ەكى اۋە اپاتىنان كەيىن SCAT كومپانياسىنىڭ Boeing 737 MAX ۇشاعىن پايدالانۋدى ۋاقىتشا توقتاتتى. Boeing كومپانياسى لاينەردى قايتا سەرتيفيكاتتاۋ جانە كوممەرتسيالىق پايدالانۋعا قاۋىپسىز قايتارۋ ءۇشىن اقش فەدەرالدىق اۆياتسيا باسقارماسىنىڭ جانە باسقا دا رەتتەۋشى ورگانداردىڭ بارلىق تالاپتارىن ورىندادى.

27 قاڭتاردا Boeing ۇشاعىن قايتادان پايدالانۋدى ەۋروپالىق اۆياتسيالىق قاۋىپسىزدىك اگەنتتىگى جانە ۇلىبريتانيانىڭ ازاماتتىق اۆياتسيا باسقارماسى ماقۇلدادى. بۇعان دەيىن Boeing 737 MAX برازيليا ۇلتتىق ازاماتتىق اۆياتسيا اگەنتتىگى جانە كانادا كولىك دەپارتامەنتىنەن سەرتيفيكات العان.

"The Qazaq Times"