زەلەنسكيدىڭ يمپيچمەنت پروتسەسى باستالدى

«وپپوزيتسيالىق پلاتفورما – ءومىر ءۇشىن» پارتياسى پرەزيدەنت ۆلاديمير زەلەنسكيدىڭ يمپيچمەنت پروتسەسىن باستادى. ءتيىستى قاراردى بەيسەنبىدە پارتيانىڭ كەزەكتەن تىس سەزى قابىلدادى.

رەسمي قۇجاتتا: «سەزد جوعارعى راداداعى وپپوزيتسيالىق پارتيا فراكتسياسىنىڭ زەلەنسكيدى ۋكراينا پرەزيدەنتى قىزمەتىنەن بوساتۋ ءراسىمىن يمپيچمەنت رەتىندە باستاۋ تۋرالى شەشىم قابىلدادى»، – دەلىنگەن.

پارتيا «زەلەنسكيدىڭ كونستيتۋتسياعا قارسى جانە زاڭسىز ارەكەتتەرىنە» بايلانىستى يمپيچمەنت پروتسەسىن باستاعان.

سەزد پارتيانىڭ باسقارۋ ورگاندارىنا وپپوزيتسيالىق پارتيا وكىلى تاراس كوزاكتىڭ قۇقىعىن جانە ىسكەرلىك بەدەلىن، «112 ۋكراينا»، ZIK جانە NewsOne جۋرناليستىك توپتارىنىڭ قۇقىقتارىن قورعاۋ ءۇشىن قاجەتتى ساياسي، قۇقىقتىق جانە ۇيىمداستىرۋشىلىق رەسۋرستاردى ۇيلەستىرۋدى تاپسىردى. سونىمەن قاتار، وبلىستىق پارتيا ۇيىمدارىنا زەلەنسكي يمپيچمەنتىنە قولداۋ كورسەتۋ ءۇشىن قول جيناۋ تاپسىرىلدى.

2 اقپان زەلەنسكي ءۇش تەلەارناعا – «112 ۋكراينا»، ZIK جانە NewsOne-عا سانكتسيا ەنگىزۋ تۋرالى شەشىم شىعارعان.  ياعني پرەزيدەنت 3 بىردەي تەلەارنا باسشىسى ءارى وپپوزيتسيالىق پارتيا وكىلىنە قارسى 5 جىلعا سانكتسيالار سالدى. بۇل شەشىمدى جوعارعى رادا دەپۋتاتتارىنىڭ كوبى قولداعان. سالدارىنان 3 تەلەارنا قىزمەتىن توقتاتتى.

شەكتەۋلەردەن كەيىن ليتسەنزيالاردىڭ كۇشى جويىلۋى مۇمكىن جانە تەلەباعدارلامالاردى رەترانسلياتسيالاۋدى ۋاقىتشا توقتايدى. تەلەارنالاردىڭ اكتيۆتەرىن بۇعاتتاۋ، كاپيتالدى ەلدەن شىعارۋعا تىيىم سالۋ، ەكونوميكالىق جانە قارجىلىق مىندەتتەمەلەردى توقتاتۋ، باعالى قاعازدارمەن مامىلەلەر جاساۋعا تولىق نەمەسە ءىشىنارا تىيىم سالۋ، ۋكراينا ۇلتتىق بانكىنىڭ شەتەلدىك ينۆەستيتسيالاردى جۇزەگە اسىرۋعا جانە شەتەلدە قاراجات ورنالاستىرۋعا رۇقساتتارى مەن ليتسەنزيالارىن قايتارىپ الۋ قاراستىرىلعان.

زەلەنسكيدىڭ سانكتسيالارىنان كەيىن تەلەارنالاردىڭ ەفيرلىك حابار تاراتۋى توقتاتىلدى. سانكتسياعا ىلىنگەن تەلەارنانىڭ ءبىرى ۋكرايناداعى «وپپوزيتسيالىق پلاتفورما – ءومىر ءۇشىن» پارتياسىنىڭ وكىلى، جوعارعى رادا دەپۋتاتى تاراس كوزاكقا تيەسىلى. دەپۋتات مۇلىك پايدالانۋ جانە بيلىك ەتۋ، ساۋدا وپەراتسيالارىن جۇرگىزۋ، ۋكراينا اۋماعىندا رەسۋرستاردى تاسىمالداۋ، ترانزيتتەۋ قۇقىعىنان بەس جىلعا شەتتەتىلەدى. سونداي-اق كاپيتالدى ۋكراينادان تىس جەرلەرگە شىعارۋعا تىيىم سالىنادى.

"The Qazaq Times"