ادەبيەت پەن ونەر وكىلدەرىنە پرەزيدەنت ستيپەندياسى تابىستالدى

بۇگىن، 29 قاڭتار كۇنى الماتى قالاسىنداعى «دوستىق ۇيىندە» بىرقاتار ادەبيەت جانە ونەر وكىلدەرىنە پرەزيدەنت ستيپەندياسى تابىستالدى. شاراعا مەملەكەتتىك حاتشى قىرىمبەك كوشەرباەۆ، مادەنيەت جانە سپورت ءمينيسترى اقتوتى رايىمقۇلوۆا جانە الماتى قالاسىنىڭ اكىمى باقىتجان ساعىنتاەۆ قاتىستى.

مەملەكەتتىك حاتشى ق.كوشەرباەۆ شارانى باستاپ اشتى. فوتو: QT,

«دوستىق ۇيىندەگى» جۇزدەسۋدە مەملەكەتتىك سىيلىقتىڭ يەگەرى، م.و.اۋەزوۆ اتىنداعى قازاق ۇلتتىق دراما تەاتىرىنىڭ اكتەرى ءسابيت ورازباەۆقا ءى دارەجەلى «بارىس» وردەنى تابىس ەتىلدى. اتالعان ماراپات س.ورازباەۆتىڭ 85 جىلدىق مەرەيتويىنا وراي تابىس ەتىلدى. ماراپاتتى مەملەكەتتىك حاتشى ق.كوشەرباەۆ تابىس ەتىپ، قر ەكس-پرەزيدەنتى ن.نازارباەۆ پەن پرەزيدەنت ق.توقاەۆتىڭ ارنايى قۇتتىقتاۋ حاتىن وقىدى. ءمينيسترى ا.رايىمقۇلوۆا مەن ب.ساعىنتاەۆ مادەنيەت جانە سپورت مينيسترلىگى جانە الماتى قالاسى اكىمدىگىنىڭ اتىنان ونەر قايتارتكەرىنىڭ يىعىنا شاپان جاۋىپ، ارنايى سىيلىقتارىن تارتۋ ەتتى.

س.قورڭىربايۇلىنا "بارىس" وردەنى تابىس ەتىلدى.

ال، پرەزيدەنت ستيپەندياسىنىڭ يەگەرلەرى قاتارىندا ونەر مەن ادەبيەتتىڭ ءابدىجامىل نۇرپەيىسوۆ، قابدەش ءجۇمادىلوۆ، ءاسانالى ءاشىموۆ، نۇرعالي ءنۇسىپجانوۆ، الەكساندر گاركوۆەتس، دۋلات يسەبەكوۆ، بولات ايۋحانوۆ، ەگەۋحان مۇحاماديقىزى، تەمىرحان مەدەتبەكوۆ، ەسمۇحان وباەۆ، يرانبەك ورازباەۆ قاتارلى ونەر اعا بۋىن وكىلدەرى، ەرلان تولەۋتاي، ديدار امانتاي قاتارىلى ورتا بۋىن وكىلدەرى مەن باۋىرجان حاليوللا، ميراس اسان، اسەل جانگاسكاەۆا، ايان وتەپبەرگەن، ۆالەريا نەدلينا قاتارلى جاس قالامگەرلەر مەن ونەرپازدار بولدى.

"كوشپەندىلەر" كوشپەندىلەر ونەرىن الەمگە تانىتتى.

مادەنيەت جانە سپورت ءمينيسترى اقتوتى رايىمقۇلوۆا شارا ورتاسىندا قۇراما شتاتتارداعى كاسكادەرلەر الەمدىك اكادەمياسىنىڭ Taueus سىيلىعىن العان «نوماد» Nomad Stunts كاسكادەرلەر توبىنىڭ جەتەكشىسى جايجاربەك كۇنعوجينوۆتى ارنايى ماراپاتتادى. شىعىرماشىلىق توپتىڭ الەمدىك كينو سالاسىنداعى جەتكەن جەتىستىگىن جوعارى باعالاپ، شىعارماشىلىق جۇمىسىنا تابىستار تىلەدى.

ەگەۋحان مۇحاماديقىزى وتباسى قۇندىلىقتارىن قورعاۋ تۋرالى ۇسىنىسىن ايتتى. فوتو: QT,

كەزدەسۋدە ادەبيەت پەن ونەر وكىلدەرى اتىنان قازاق ونەرىنىڭ قادىرلى اقساقالى ءاسانالى ءاشىموۆ، قازاقستان جازۋشىلار وداعىنىڭ مۇشەسى، قر مادەنيەت قايراتكەرى، اقىن ەگەۋحان مۇحاماديقىزى جانە جاستار اتىنان اقىن ميراس اسان ءسوز الدى. التىن القا يەگەرى، قادىرلى انا ەگەۋحان مۇحاماديقىزى مەملەكەتتىك حاتشى مەن مادەنيەت ءمينيسترى قاتىسقان جيىندا وتباسى قۇندىلىقتارىن دارىپتەۋگە مەملەكەت تارابىنان باسا نازار اۋدارۋ كەرەكتىگىن، ۇرپاق تاربيەسى – ۇلت بولاشاعى ەكەنىن اتاپ ءوتتى. ق.كوشەرباەۆ بۇل پىكىردى قۇپتادى جانە وسى باعىتتا شارالاردىڭ جاسالاتىنىن ايتتى.

“The Qazaq Times”