«ادىلەتميننىڭ ادىلەتسىزدىگىنە نارازىلىق»: بەكشين مەن ساعىنتاەۆتىڭ اراسىندا قالعان ادۆوكاتتار

ادۆوكاتتار ءوز قىزمەتىنە كەدەرگى كەلتىرەتىن ادىلەت مينيسترلىگىنىڭ زاڭ جوباسىنا قارسىلىق رەتىندە 13 ناۋرىزدا وتەتىن بەيبىت جيىنعا دايىندالىپ جاتىر. ۇيىمداستىرۋشىلار ازىرگە اكىمياتپەن زاڭدى تۇردە كەلىسىلگەن ميتينگكە بايلانىستى شارانى وتكىزبەۋ جونىندە حابار الماعان. قۇقىق قورعاۋشىلار ساعىنتاەۆ رايىنان قايتىپ، قاۋلىسىنان باس تارتقان كۇننىڭ وزىندە دە جەكەلەگەن پيكەتكە شىعاتىنىن مالىمدەدى.

جۇما كۇنى اقپارات قۇرالدارىندا الماتى قالاسىنىڭ باس سانيتارى بەكشيننىڭ ورىنباسارى ساداۋاقاس بايعاۋلوۆتىڭ ادامداردىڭ توپتاسۋىنا، سونىڭ ىشىندە ميتينگ ءتارىزدى جيىندار وتكىزۋ شەكتەلگەنى تۋرالى پىكىرى جاريالاندى. سانيتاريالىق-ەپيدەميولوگيالىق باقىلاۋ دەپارتامەنتىنىڭ ءباسپاسوز حاتشىسى بالسۇلۋ الەكەنوۆا قايداي دا ءبىر قوعامدىق جيىن ۇيىمداستىرۋعا رۇقسات ەتىلمەگەنىن حابارلاعان.

«ءبىزدىڭ قولىمىزدا اكىمنىڭ ميتينگتى سانكتسيالاعانى تۋرالى قاۋلى بار. ءۇش كۇننەن بەرى وسى اكتسياعا قامدانىپ جاتىرمىز. كەشە تۇستە ساعات 14.00-دە شوقان ءۋاليحانوۆ ەسكەرتكىشىنىڭ ماڭىندا ساعىنتاەۆتىڭ ورىنباسارى، مەدەۋ اۋدانىنىڭ اكىمى جانە پوليتسيا وكىلدەرىمەن كەزدەسىپ، شارا جونىندە مامىلەگە كەلدىك. ولاردان ەشقانداي تىيىم بولعان جوق. ونىڭ ۇستىنە، قولىمىزدا اكىمنىڭ رۇقساتى بار. ەگەر اكىمنىڭ قاۋلىسى كۇشىن جويعان بولسا، وندا جازباشا حابار بەرىلگەن بولار ەدى. قالاي دەسە دە اكتسياعا قاتىسامىز، – دەيدى ۇيىمداستىرۋشىلاردىڭ ءبىرى ادۆوكات گۇلنار جۋاسپاەۆا Vlast رەداكتسياسىنا بەرگەن جاۋابىندا.

ادۆوكات قالاداعى احۋال تج رەجيمى ەمەس، ءبىر جىلدان بەرگى كارانتين شەكتەۋى دەڭگەيىندە بولعاندىقتان، قالاي بولعان جاعدايدا دا نارازىلار ميتينگكە شىعاتىنىن جەتكىزدى. ول «قوعامدىق بەيبىت جيىنعا تىيىم سالعان كۇننىڭ وزىندە جەكەلەگەن پيكەتكە شىعامىز. ءبىزدىڭ ارنايى جسوپارىمىز بار. پيكەت وتەتىن ورنى مەن ۋاقىتىن قوسىمشا حابارلايمىز» دەدى.

قوعامدىق رەزونانسقا اينالعان ماسەلە جايلى بۇگىن تۇستە پارلامەنت ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ توراعاسى قانات مۋسين Facebook جەلىسىندەگى پاراقشاسىندا داۋ تۋدىرعان كەيبىر نورمالار سەنات پەن ءماجىلىستىڭ بىرىككەن كوميسسياسىندا قايتا قارالاتىنىن جازدى.

ادۆوكاتتار ادىلەت مينيسترلىگى ازىرلەگەن «ادۆوكاتتىق قىزمەت جانە زاڭ كومەگى تۋرالى» زاڭ جوباسىنداعى «اۆتوريتارلىق سيپاتى بار نورمالارعا» قارسىلىق ءبىلدىرىپ جۇرگەنىنە بىرنەشە اپتا ءوتتى.  وزگەرگەلى تۇرعان زاڭ جوباسىندا ءتۇرلى كەڭەستەرگە مۇشە بولۋعا، وعان جارنا تولەپ وتىرۋعا، «ە-زاڭ كومەگى» رەسۋرسىنا ۇدايى جەكە دەرەكتەردى ەنگىزىپ وتىرۋعا مىندەتتەيتىن تالاپتار قاراستىرىلعان. زاڭگەرلەر مەن ادۆوكاتتار بيلىكتىڭ بۇل ارەكەتىن مامانداردىڭ تاۋەلسىزدىگىن شەكتەۋ، ولاردى باقىلاۋعا الۋ ءارى قۇقىق قورعاۋ ىسىنە ارالاسۋ دەپ سانايدى.

"The Qazaq Times"