كانادانىڭ كونسەرۆاتيۆتى وپپوزيتسيالىق پارتيا بيلىكتەگى ليبەرالدى پارتيادان اقش قاتارىنا قوسىلىپ، قىتاي ۇكىمەتىنىڭ شىڭجاڭداعى گەنوتسيدىن انىقتاۋدى تالاپ ەتتى. ولار كاناداداعى ادام قۇقىعىن قورعاۋ ۇيىمى جانە اقش دەپارتامەنتتەرىمەن بىرلەسە وتىرىپ، قىتاي ۇكىمەتىنىڭ شىڭجاڭداعى از ساندى ۇلتتارعا قارسى گەنوتسيد پەن ادامزاتقا قارسى قىلمىستار جاساعانىن، ونىڭ ىشىندە حالىقتى جۇيەلى باقىلاۋدى، جىنىستىق زورلىق-زومبىلىقتى جانە جاپپاي ۇستاۋدى انىقتاۋدى تالاپ ەتكەن.

بىرلەسكەن مالىمدەمەنى كونسەرۆاتيۆتىك پارتيانىڭ سىرتقى ىستەر مينيسترگە ۇمىتكەرى، ءارى كونگرەسس مۇشەسى ميچەل چوڭ باستاپ جانە وزگە دە كونگرەسمەندەر 24 قاڭتار كۇنى جاساعان. مالىمدەمەدە، قىتاي ۇكىمەتىنىڭ ارەكەتى جالپىعا ورتاق ادام قۇقىعى مەن حالىقارالىق قۇقىقتارعا مۇلدە قۇرمەت ەتپەيتىندىگىنىڭ ايقىن دالەلى دەپ كورسەتكەن. سونداي-اق، قۋعىن-سۇرگىن قۇرباندارى اراسىندا گونكونگ تۇرعىندارى، تيبەتتەر، فالۋن-گۋن قوزعالىسىنىڭ مۇشەلەرى جانە مۇسىلمان، حريستيان، وزگە دە ءدىني-ەتنيكالىق ازشىلىقتاردىڭ بار ەكەنىن باسا ايتقان.

«كونسەرۆاتيۆتى پارتيا ادام قۇقىعىن بۇزۋعا قارسى كۇرەسۋ ءۇشىن كوپجاقتى ىنتىماقتاسۋ ماڭىزدى دەپ سانايدى. ءبىز تريۋدو (كانادا پرەمەر-ءمينيسترى، رەد.) ۇكىمەتىن بايدەن اكىمشىلىگىمەن قىتايدىڭ ۇيعىرلاردى قىرعىنعا ۇشىراتقانىن رەسمي تۇردە تانۋ ءۇشىن جۇمىس ىستەۋگە جانە كانادا ۇكىمەتىن  باسقا وداقتاستارىن وسىعان اس سالىسۋعا شاقىرۋىن تالاپ ەتەمىز»، – دەگەن مالىمدەمەدە.

شىڭجاڭداعى قىتايدىڭ ادام قۇقىقتارىنىڭ بۇزىلۋىنا جاۋاپ رەتىندە كانادا ۇكىمەتى وسى ايدىڭ باسىندا بىرقاتار جاڭا شارالار قابىلدادى، سونىڭ قاتارىندا وتاندىق كومپانيالارىنا شىڭجاڭداعى ءماجبۇرلى جۇمىسپەن اينالىساتىن قىتايلىق جانە وزگە شەتەلدىك كومپانيالارمەن بيزنەس جۇرگىزۋگە تىيىم سالۋ شاراسى دا بار.

ايتا كەتەيىك، ترامپ ۇكىمەتى بيلىكتەن كەتەر الدىندا بەيجىڭ بيلىگى شىڭجاڭداعى از ساندى ۇلتتارعا قارسى گەنوتسيد جاسادى دەپ رەسمي تانىدى. بايدەننىڭ باس ديپلوماتى دا ترامپ اكىمشىلىگىنىڭ بۇل شەشىمىمەن كەلىسكەن. الايدا، قىتايدىڭ گەنوتسيد پەن ادامزاتقا قارسى قىلمىستىق ارەكەتتەرىنىڭ جاۋابى رەتىندە اقش جاڭا ۇكىمەتىنىڭ قانداي ناقتى شارالار قابىلدايتىنى ءالى دە انىق ەمەس.

“The Qazaq Times”