فوتو: ۆۆس

ۇلىبريتانيادا تىركەلگەن كوروناۆيرۋستىڭ جاڭا شتامى 60 ەلدە انىقتالدى. بۇل تۋرالى دۇنيەجۇزىلىك دەنساۋلىق ساقتاۋ ۇيىمى جەنەۆادا جاريالانعان اپتالىق ەپيدەميولوگيالىق بيۋللەتەنىندە حابارلادى.

«12 قاڭتاردان باستاپ كوروناۆيرۋستىڭ وزگەرگەن ءتۇرى تاعى 10 مەملەكەتتە تىركەلدى. ال وڭتۇستىك افريكادان شىققان ۆيرۋس تاعى ءۇش ەلدە انىقتالدى جانە ولاردىڭ جالپى سانى 23-كە جەتتى. برازيليادا P. 1 دەپ اتالاتىن كوروناۆيرۋستىڭ ءبىر ءتۇرى تابىلىپ، B. 1.1.28 مۋتاتسياسىنىڭ تاعى ءبىر جاعدايى تىركەلدى. الايدا، بۇل ۆيرۋستاردىڭ قناشالىقتى جۇقپالى ەكەندىگى تۋرالى جەتكىلىكتى اقپارات جوق. ددسۇ ساراپشىسى ماريا ۆان كەركحوۆ 8 قاڭتاردا جەنەۆادا وتكەن بريفينگتە ۇلىبريتانيادا انىقتالعان كوروناۆيرۋستىڭ جاڭا شتامى ادەتتەگى نۇسقاعا قاراعاندا تەز تارالاتىنىن راستادى.

بۇعان دەيىن حالىقارالىق ۇيىم «كوروناۆيرۋستىڭ جاڭا نۇسقالارى پايدا بولۋى مۇمكىن» دەگەن. سەبەبى ۆيرۋس ۇنەمى وزگەرىپ، مۋتاتسياعا ۇشىراپ وتىرادى.

ددسۇ-نىڭ توتەنشە جاعداي جونىندەگى كوميتەتى 14 قاڭتارداعى وتىرىسىندا بارلىق مەملەكەتتى مۋتاتسيالانعان ۆيرۋستىڭ گەنومدىق رەتتىلىگى تۋرالى عىلىمي زەرتتەۋلەردى ارتتىرىپ، قولدا بار اقپاراتپەن بولىسۋگە شاقىردى.

ۇلىبريتانيا مەن وڭتۇستىك افريكادا كوروناۆيرۋستىڭ جاڭا شتامدارى جەلتوقساندا بەلگىلى بولدى. عالىمداردىڭ پىكىرىنشە، جاڭا كوروناۆيرۋستىڭ ەكەۋى دە جۇقپالى جانە اگرەسسيۆتى. دەگەنمەن، بۇل شتامدار ءوزارا بايلانىستى ەمەس.

سونىمەن قاتار، كوروناۆيرۋستىڭ جاڭا ءتۇرى كادىمگىسىنە قاراعاندا 50-70% جىلدام تارالاتىنى بەلگىلى بولدى. ۆيرۋس مۋتاتسياسى ۇلىبريتانيادا شاپشاڭ جايىلىپ بارادى، سونىڭ سالدارىنان اتالعان ەلدە كەيىنگى كۇندەرى ءبىر تاۋلىكتە 50 مىڭنان استام ناۋقاس تىركەلىپ ءجۇر. بۇل بۇرىن-سوڭدى تىركەلمەگەن جوعارى كورسەتكىش. بيلىك قايتادان جاپپاي لوكداۋن ەنگىزۋگە ءماجبۇر بولعان.

ۇلىبريتانيادا Covid-ءتىڭ وزگەرگەنى جايلى اقپارات العاش رەت جەلتوقسان ورتاسىندا ايتىلا باستاعان. ينفەكتسيونيستەردىڭ پىكىرىنشە، جاڭا شتامم كوروناۆيرۋستى جەڭە الماعان يممۋنيتەتى ءالسىز ناۋقاس اعزاسىندا جەتىلىپ، دامىعان بولۋى مۇمكىن.

"The Qazaq Times"